Jowai: U SP ka EJH da pyntip u wa ynnin ka 9 tarik heipor kamwa 11:15 i miet, ki pulit ka Ratacherra Check Post heipor wa pynman ki yei sylli yei psiah tooh ki bru chapoh ka jylla da yoh kem ki ya ki ar ngut ki nong Nigeria heipor kiwa dang lai luti ki da ka Night Super Bus wa em ya u number ML-05-M-1899 kawa wan na Agartala yow lai cha Guwahati.
Hawa pynman yaka takit, kini ki arngut ym ye ki wow sai ya ki kot ki sla wa biang yow pynsakhiat kammon psiah ki chapoh ka ri India wei da ye ki du wow sai ya ki Xerox Copy yong ki Passport yong ki deiwa kam wa ya ki Passport yong ki da ieh ki ha Bangladesh wei da psiah ki chapoh ka ri India lyngba ka jylla Tripura.
Da iwa kem sa ya kini ki arngut da poi waroh 19 ngut ki nong Nigeria kiwa da yoh kem ki pulit ka EJH haka chi bnai.
Kiwa chah kem ha kani ka kynti toh u Victor Ojichukwu Ugo Okeke (30 snem) uwa naka jylla Anambra, Nigeria wa u Ifechkwu Emmanuel Obi (34 snem) uwa na jylla Anambra, Nigeria.
Discussion about this post