Shillong: Ka tnat Fisheries, yong ka sorkar jylla ynne da pynman ko ya ka 4th State Aqua Fest 2017 ha State Central Library, Shillong heiwa ka Roshan Warjri, ka Montri ka tnat Health and Family Welfare da man ko kam ka kongsan hei emlang u Dr. B.D.R. Tiwari, Secretary, Fisheries Department, u Ram Singh, Director, Fisheries, u O. Nongbri, Managing Director, wa kiwi kiwi.
Hei klam ha kani ka sngi ka Warjri da ong ko wa ka State Aquaculture Mission da sdang ya ka wow pyndap yeiwa emkaam dakha hapoh ka jylla khamtam ha ki thaiñ nongkyndong.
Da ong chooh chooh ko wa emkaam leh u yakrehlang chirup wa ki seiñbhalang, ki bru samen wa kiwi kiwi yow pynku ya kani ka kaam psan dakha.
Ha kani ka sngi da pyllait leh ya ka kot wow esikai ya kiwa psan dakha wa tip kam ka Training Manual for Potential Fish Farmers of Meghalaya on “Aquaculture and Advance Techniques for Fish Culture”.
Da saam leh ya ki khusnaam cha ki bru samen, ki Community Awards wa ki Sanctuary Awards for Excellence neibynta kiwa da ku bha ha kani ka kaam.
Ki bru samen kiwa da yoh khusnaam toh u Worson Kharsohnoh na Kharnongwang, Mawphlang C&RD Block, East Khasi Hills District, u Shanbor Sohbar na Umshiaw, Umsning C&RD Block, Ri Bhoi District, u Dominic Nongsiej na Mawkynjoin, Nongstoin C&RD Block, u Teiborsing Wahlang na Jakrem, Mawkyrwat C&RD Block, u Bislin Lyngdoh na Sunapyrdi, East Jaiñtia Hills District wa u Willy Pohplet na Muktapur, Amlarem C&RD Block.
Ya ki khusnaam Community Award da yoh ka Hatmawdon Area Fishery Co-operative Society Ltd, Hatmawdon, Mawsynram C&RD Block, ka Nangiaishlei SHG Community Fishery Project, Tiehdang, Mawthadraishan C&RD Block, ka Bankyntiewlang SHG na Mawlaho, Umsning C&RD Block wa ka Nonglang Fishery Co-operative Society Ltd., Pyndenksing hapoh ka Mawkyrwat C&RD Block.
Ya ka Sanctuary Award da yoh ka Rohbah Sanctuary, kawa da yada da ka Mawthawpdah Area Rilang Fishing Association (MARFA).
Discussion about this post