20 ngut ki kynthai kiwa da chah jied wow yoh yei sikai soor, da yei ki wow pyndep yeini wa da pynman da ka Community Institute of Technology (CIT), Amlarem hapoh ka Amlarem Block deiwa kyrchaan ka Meghalaya State Skill Development Society ka sorkar Meghalaya lyngba ka Skills Meghalaya Project.
Ya kani ka e sikai kawa 350 kynta da pynlai da ka CIT hapoh Amlarem Centre neibynta ki kynthai wei i thmu yong ka e sikai toh wow kyrchaan ya ki khynnah khynroo ki wym pu em khih em khan yow ye ki wow seiñ khih da i yong ki hi.
Ha ka 6 tarik uni u bnai, da yoh wow saam Certificate cha kitu kiwa da pyndep yei chah sikai da u Lahkmen Rymbui, MLA ka thaaiñ kamjooh u Montri sorkar, wei da saam u leh wa ki kor soor that wow yarap ya kiwa da pyndep yei sikai wow sdang ki yei kreh yong ki.
Ya kani ka yalang wa da pynman hapoh ka yung krehkaam ka Amlarem C&RD Block, da emlang leh u Dr. D. Lyngdoh, Block Development Officer, Amlarem C&RD Block kam uwa chah khut kyrpang wa u Lambormi Suchen uwa man kam u Skill Development Officer (SDO) yong ka Meghalaya State Skill Development Society, Jowai.
U Lahkmen kam u kongsan hawa e yei klam da khana u wa ka sorkar da pynchlur ya kiwa chong chnong wow lai cha kam kini ki thaw wa e sikai boon jait wei kamjooh leh ka sorkar kwah ko wa uwi pa uwi uwa chong chnong wa em yei sap wow yoh ki yei chah sikai yow pynpliah.
Kamtæ da kyntu joor u ya kiwa chah sikai wow chimkhia ya kani ka e sikai wa da yoh ki khnang wow man ko i myntoi ya ki weiwa ym toh u hun du ha ini tangwa wow lai pynpliah chooh chooh khnang wow ye ki u pynlai yaaw ya ki that ki nep, ki riam ki bait wa soor ki.
Da yoh leh yei pynchlur wei kyntu ya kiwa da dep chah sikai na u Dr. D. Lyngdoh, na u Lambormi Suchen, wa na u H. R Lanong, Head Master Zion Modern School.
