Ka Community & Rural Development Department, ka State Institute of Rural Development (SIRD) deiwa ya krehlang ka Meghalaya Administrative Training Institute (MATI) ynne da pynman ki ya ka Orientation Programme neibynta kiwa dang psiah kreh kam ki Junior Rural Development Officers (JRDO) ha ka yalang wa da pynman ha Yojana Bhavan, Main Secretariat, Shillong.
Neiliang u Chief Secretary, u D P Wahlang da wan u wow chimbynta kam u kongsan deiwa emlang u Principal Secretary, C&RD Department, u Sampath Kumar.
Neiliang u D P Wahlang hawa e yei klam da e khublei u ya kini ki JRDO kiwa dang psiah kreh wei da pynchlur u leh ya ki wow kreh ki neibynta ki paidbah.
Da kdaw u wa i kaam wa hakhmat dooh yong ki toh wow yachem wa ki bru paidbah kamtæ da sneiñ u wow man kiwa sñiawthooh wei kiwa tip u burom yeiwa sñiaw ki bru wei wow yaklam wa ki da i ktien wa sñiawthooh ki. Da pynkynmoo u leh wa ka Meghalaya toh kawa boon kiwa khih wa khan kiwa em cha ki thaw wa palatsor, wei deiwa biang i kreh ki daw pynku ko yei yoh i kot ka jylla.
Chooh chooh da pynchlur u leh ya ki wow leh ya ki kaam wa ktah ya ki bru hei rukom wa bha wei ymtoh u tieñ ki yei wym poi cha ka thong. Da klam u leh chaphang i emkaam wow pynlang poisa neibynta ka mynried ki manda chong ngiah ki.
