Kam chibynta wow pynkhreh ya ki khynnah khynroo khyllood ka jylla neibynta ka mynried, ka sorkar Meghalaya, lyngba ka chnat krehkaam yong ka Sports & Youth Affairs, deiwa ya ksohktilang wa ka chnat Education, da pynman ki ya ka thong krehkaam kawa tip kam ka ‘Aspire Meghalaya’ wa da pynkrehkaam da ka AVENUES, Shillong.
Hawa yatoh wa ini da em 1,917 ngut ki khynnah na ki 9 tylli ki skur wa College ha ki District waphær waphær hapoh ka jylla kiwa da yoh myntoi na ki chah sikai ha ki Soft Skills wa ka Talent Identification Programme yong ka Aspire Meghalaya ha ka tayaw wa da dep.
I thmu toh yong kani ka e sikai toh wow pynpliah ya ki khynnah ha kiwa boon ki liang chwa wa ki u thooh kreh ki wei wow pynchlur wow sai yei sap khnang wow yoh ki wow pynyabi wa ki Scheme waphær waphær yong ka sorkar jylla.
Ki khynnah wa da pyndep yei chah sikai da pynkup burom ya ki ha kini ki 9 tylli ki skur wa em hapoh ka jylla.
Ha Khliehriat da emlang u Jonathan Shylla (MCS), ADC, East Jaintia Hills District uwa da klam chaphang kiwa emkaam u tip hawa leh Interview deiwa khan leh yeiwa chem u hei kaam yong oo. Da ong u leh wa du wow pyndep ya ka puræ puthi ym pu biang tangwa emkaam leh tip ya chiboon kiwi ki sap nadooh kammon u klam, u pynyatoh namo ki Communication Skill wei hapoh ka Aspire Meghalaya da yoh ya kini ki e sikai.
Ka Aspire Meghalaya da e sikai ko ya ki khynnah wow man kiwa chlur mynsien (Confidence), ka rukom pyrkhat wa che (Clarity) neibynta ka mynried, ka rukom pynyatoh wei wow klam para bru (Communication) wei wow ye u lai chakhmat hawa maad yei eh waphær waphær (Emotional Resilience). Kawi na ki e sikai toh chaphang ka Career Exploration namo wow tip u jied ya ki laad puræ da kiwa yatoh wa ki wei kammon wow ku chaphrang ha ki kaam ki jaam.
Ha Sutnga da wan wow emlang waka Simiroy Khongtiang, kawa chna phlim wa pawnaam na Ri-loom Jaiñtia Hills, kawa da e mynsien ya ki khynnah deiwa ong, “Nga da rem O boonsien wei nga da leh O chiboon ki bakla leh. Tangwa deiwa angnood wei skem yumut, nga beh O ya ka thong. Hawa im phi man ko kam ka jhaad ya kawa hap phi wow pynpær hajrong um deiwa skem yumut wei wow pynkhlan ya idæ, neibhah du phi donhi wa ye wow yah ya ka jhaad yong phi cha ki thaw wa thmu phi wow lai.” Da pynsñiaw ko leh yei sñiawngooh ya kiwa sikai kiwa emlang ha ka yalang deiwa ong, “Nga man O kamni kamwa man toh na kiwa sikai ya nga wei nga e khublei O ya phi yei kyrchaan yong phi ya ki khynnah khynroo ha ini i lai luti yong ki.”
Hapoh kani ka Aspire Meghalaya da pynman leh yei pynyoo ya ki sap ki phong ki khynnah wei kiwa jop daw yoh ki yei tipmit ya ki kam ki ‘Aspire Meghalaya Stars’.
Ki 9 tylli ki thaw puræ kiwa da pyndep yei e sikai ka Aspire Meghalaya ha kani ka tayaw wa da dep kynthup ki ya ka Williamnagar Government College wa Sacred Heart Higher Secondary School, Williamnagar ha East Garo Hills; Jaiñtia Eastern College, Khliehriat wa Sutnga Presbyterian Higher Secondary School ha East Jaiñtia Hills; St. Mary’s Higher Secondary School, Shillong wa St. Anthony’s Higher Secondary School, Pynursla ha East Khasi Hills; St. Francis D’Assisi College wa St. Peter’s Higher Secondary School ha Nongstoiñ, West Khasi Hills; waka Government Girls’ Higher Secondary School, Tura ha West Garo Hills.
Nadooh wa sdang ha u Naisan uni u snem, ka Aspire Meghalaya da saam ko yei sikai cha palat 9,000 ngut ki khynnah puræ wa da jan dap 45 tylli ki skur ha ki 12 tylli ki District, wei palat 160 tylli ki sap ki phong wa da tipmit. Kani ka e sikai dang lai ko chakhmat hei thmu yong wow e sikai sa ya palat 3,000 ngut ki khynnah wa dang lai puræ ha ki bnai ki wow wan.
