Ka yung krehkaam ka District Social Welfare Officer, East Jaiñtia Hills District, Khliehriat ynne da lehwarom ko ya ka International Women’s Day ha Cham Cham Community Hall hajrong ka phang “Choose to Challenge”.
Ha kani ka sngi da emlang ka R. Passah, District Social Welfare Officer, East Jaiñtia Hills District, Dr. F. Lamin, Medical & Health Officer, Pamra-Paithlu PHC, ka R. Nongbri wa ka E. Lyngdoh, Supervisors, Women Helpline 181 Shillong, ka B. Chadong, Centre Manager, One Stop Centre, Khliehriat wa u waheh chnong ka Cham Cham.
U Dr. F. Lamin, Medical & Health Officer, Pamra-Paithlu PHC da klam u hajrong i chait i khiah i pyrkhat pyrdaiñ ki kynthai deiwa ong wa boonsien ki kynthai chem chitom ki ha ki kaam wa man-ka-sngi wei em kiwa ymye wow yaichah yeini iwa ktah ya ki wei poi hadooh u pood wow pynkut ki yei mynsien yong ki hi.
Ka Supervisor yong ka Women Helpline 181, ka R. Nongbri da khana ko ya ki kaam wa ki thong ka 181 Helpline wow e yarap 24 kynta lyngba ka phone neibynta ki kynthai kiwa emkaam yarap wei wa ye leh u e yarap ya ki lyngba ki pulit, Hospital, Ambulance, District Legal Service Authority (DLSA), Protection Officer (PO) wa ki One Stop Centres (OSC).
Da ong ko leh wa ka Women Helpline 181 yarap ko wow e yutip ha kiwa boon ki kaam wa yatoh wa ki kynthai nadooh ki Scheme wa ki programme sorkar kiwa e yarap ya ki kynthai khamtam kitu kiwa chah thombor ha ki thaw wa sah lane wa kreh ki.
Hajrong i thong krehkaam ki One Stop Centres (OSC), ka B. Chadong, Centre Manager ka One Stop Centre, Khliehriat da ong ko wa ki OSC toh wow yarap ya ki kynthai kiwa chah thombor la ha yung næ ha lait wei wa ini chong i ha jar jiar ki kaam la iwa jhan namo wym em u yoh yarap wei neitæ daw batai daw yah ya ki cha ka luti wa emkaam ki wow yoh yarap ki.
