Ki kynthai ka chnong Sabahmuswang da yoh ki yaka sikai wa kyrpang wa pynman da ka Society for Urban and Rural Empowerment (SURE), haka 30 tarik u Naitung kawa da pynman ha yung skur ha Hynniaw Thyndai Memorial LP School SSA, Sabahmuswang.
U Habandajop Lyngdoh, Master Trainer yong ka SURE da e sikai u yaki kynthai ha kani ka chnong kammon wow chna sboh wieh ya kawa tip kam ka Vermi Composting. Najrong ini, da e sikai leh kammon wow chna sboh nei ait sñiang wa i ait syiar da ka rukom wa khut kam ka Bokashi.
U Habandajop Lyngdoh uwa man leh kam uwa ri sñiang uwa da em ym duna ya arphaw tylli ki sñiang, da ong u wa da i rukom leh da ka Bokashi toh deiwa pdem donhi yei baam yow yoh e baam ya ki sñiang.
Deiwa leh ya ini, kiwa ri sñiang da lait ki wow lut poisa wow thied dieñ neibhah ym hap de ki wow chet yei baam sñiang yong ki.
