Yow wanrah i tip i chemphang ha ki bynta waphær waphær ya kiwa kreh mistri ka chnong Sohmynting, West Jaiñtia Hills District, ha ka 16 tarik uni u bnai, ka seiñ All Jaiñtia Muster Roll Workers & Labour Union, chirup i krehlang waka Skill Meghalaya hapoh ka chnat Labour waka Meghalaya AIDS Control Society da hiar ki cha Sohmynting yow pynsñiawthooh hajrong i emkaam u chim kabu ya ki laad yarap wa yoh lyngba ka sorkar kam na ka chnat Labour, na ka Skill Meghalaya wa kamjooh leh i pynsñiawthooh cha ki hajrong i kjut HIV/AIDS.
Ha ka yalang wa pynlai da u Jerry Suting, da emlang u Lambormi Suchen, Skill Development Officer, West Jaiñtia Hills, u Baraplang Sohklet, Inspector ka chnat Labour West Jaiñtia, u Khroo L Pariat, Adviser ka All Jaiñtia Muster Roll Worker and Labour Union, u Ajoy Lanong, Deputy Director, Meghalaya AIDS Control Society, ka Daiowanphi Iakai, President ka All Jaiñtia Muster Roll Workers and Labour Union, u Sonjoy Shylla, Centre Head ka Greta Solution Training Academy, Jowai wa kiwi.
U Ajoy Lanong hawa klam pynche hajrong u khñiang kjut HIV/AIDS, pyntip u wa hapoh ka jylla Meghalaya em kamwa 9300 tam kiwa yoh ya uni u khñiang kjut, neitæ da khana u leh ya 4 tylli ki laad wa ye yoh ya uni u khñiang wa kynthup lyngba i snaam, i chongkha pathar, i pynemkaam u jooh u thyrnia Inject wei naka bei wa punkhon wa em ya uni u khniang tæ bi cha ki khon.
Neiliang u Baraplang Sohklet da khana pynche u heiyatoh waka Meghalaya Building and Other Construction Workers Welfare Board kawa man ka Board wa pait yei bha i miat kiwa kreh mylla kreh mistri.
Kamtæ kyntu u ya ki wow pynpsiah pyrtuid yow man dkhot ha kani ka Board wei i rta toh 18 hadooh 58 snem. Lyngba kani ye u yoh ka Scholarship neibynta ki khon nadooh Class 1 hadooh Degree kamjooh Diploma.
Neitæ em leh ka Pension kawa Rs. 1000 ya kiwa da palat 60 snem i rta, wa kamjooh i yoh yarap wa Rs. 2 lak la jia wa yap mynsoo ki dkhot.
Neiliang u Lambormi Suchen da khana u ya ki e sikai namo ki Skill Training waphær waphær wa da wanrah ka sorkar neibynta ki khon khynroo khyllood ka jylla yow yoh laad ki u pynpliah yei sap wa em ha ki, khnang yow ye ki u sdang yei khih i khan.
Kyntu haroh u ya ki mistri kiwa da pyndep yei chah sikai lyngba ka Skill Meghalaya khamtam yow chim ki ya ki laad yarap wa yoh na ka chnat Labour neibhah ym du wa pynmyntoi ko ya ki tangwa ya ka yung ka sem haroh ki.
U Khroo L. Pariat hawa e yei klam ong u wa waroh ki chynrang wa da pyndep yei chah sikai u man nongmuna ki ya kiwa boon, heijooh i por kyntu u ya kiwi won ki mistri wow lai li pynpliah ki yei sap lyngba ka Skill Meghalaya khnang yow yoh Certificate wei wow pynpsiah pyrtuid næ man dkhot leh hapoh ka chnat Labour.
Da pynsñiaw haroh u heiyatoh i emkaam u pynneh pynsah ya ki umbaam umdih wa da yoh yow lait ko u dooh jait wei wow pynneh i khooid i jngiar.
Neitæ kyntu u leh wym toh u ngop ha ki sih wa boonjait khamtam i drugs, kamwa da yoo ha kini ki sngi wot kiwa kreh mylla leh da boon kiwa ngop.
Wei yow yakhun yei kaam sih emkaam i yakrehlang khnang yow wan i miat i bha ha ka chnong ka thaw.
Discussion about this post