Ka yung krehkam yong ka District Mission Coordinator, SSA West Jaintia Hills ha ka thong wow kyntu kynrong yei puræ puthi hapoh ka District katkam wa da booh thong ka RTE Act 2009, ynne ka sngi da pynman ko i e sikai wa kyrpang ya ki Principal wa ki Headteacher yong ki skur ha Inclusive Education Resource Centre (IERS), Mihmyntdu.
Ka thong yong kani ka yalang toh wow pynche pynsñiawthooh ya ki Principal, Headteacher yong ki skur chaphang i kaamram kam ki bor pait bor pynlai yong ki skur neibynta kitu ki khynnah wa man kyrpang kiwa em i duna, tymbuiñ hei man rynyieñ rynyot kamjooh leh chaphang ki hok yong ki khynnah katkam ka RPWD Act 2016.
U L.K. Singh, District Coordinator IE, SSA West Jaiñtia Hills hawa klam kam u bru chemphang da ong u em le tylli ki skur wa da mang kyrpang neibynta kitu ki khynnah wa em i duna tymbuiñ hei man rynyieñ rynyot kitæ toh ka skur ya kitu kiwa duna hei bor thij bor pyrkhat (Mental Retardation), ka skur ya ki khynnah wa duna hei sñiaw (Hearing Impaired) waka skur wa yatoh wa ki khynnah wym yoo nae chynna (Visual impaired).
Hapoh ka jylla ya kam kini ki jait skur dang duna bha ki kamtæ booh i hei eh bha ya ki manbei manpa wow phah skur ya ki khon yong ki neibynta wow yoh ki yei stat i tip katkam wa dawa wa chah i man i long yong ki. Hanla kattæ leh hapoh ka District katwa chah i bor da pyrchang ki u leh yei wa bha tam deiwa booh ha man ki Block ya ki IE Volunteer wa ki Block Resource Person IE.
Chooh chooh da klam wei batai bniah u leh ya ki 21 tylli ki jait kjut kiwa pynhaap hapoh ka RPWD Act 2016 waka National Trust Act wei da kyrsu kyntu u leh ya ki Headteacher wa ki Principal wow man kiwa e mynsien ya ki manbei manpa lada jia wa em ki ya ki khon wa duna hei man rynyieñ rynyot wei bor thij bor pyrkhat.
Discussion about this post