Ka Mihmyntdu Community Social Welfare Association (MCSWA TI CC) Khliehriat chirup i ya krehlang waka District Social Welfare Officer East Jaiñtia Hill District ha kani ka 31 tarik u Naisan da pynman ko ya ka Sensitisation Cum Health Camp ha ka chnong Umlawang, EJH hajrong ka phang “On Need of Elderly Care (Geriatric Care) Cum Health Camp for the Elderly.”
Ya ka yalang ha kani ka sngi da pynlai da ka R. Patlong, PM MCSWA TI CC Khliehriat wei da yoh yei klam pdiang burom na u waheh chnong, u W. Lyngdoh.
Da yoh leh yei klam tbian na u Patrick Dkhar, Supervisor DSWO EJH ha kawa da batai u chaphang ki jait Scheme wa ye u yoh naka yung krehkaam u DSWO kam ka baibaam tymmen kawa yoh ki chisien wa da kynjoh ki 60 snem ki kynthai wa 65 snem ki chynrang, ka Scheme neibynta ki khynnah wa em duna hei doh i pran, chaphang ki laad yarap neibynta ki khynthai wa chah lehbeiñ banbeiñ wa ye u yoh naka One Stop Center wa kiwi kiwi.
Ka Dr. JN Shullai, Director MCSWA hawa e yei batai ha kani ka sngi da batai ko chaphang i emkaam u sumaar yaki bru wada heh i rta neibynta ki kynthai wa chynrang. Da ong ko hei im bru yoh i yei man khonboo, khynnah, khynroo wei i man tymmen. I por man tymmen toh i por iwa i hap i u pynkhreh neibhah daw em chiboon i kylla nadooh i doh i phad hadooh i pyrkhat pyrdaiñ.
Da batai haroh ya ki jait kjut wa rap yoh manda noh i rta wei kammon u sumaar ya ki.
Da ban joor ko leh wa ymhoi u dih stat yei dawai wa thied naki Pharmacy khlem da phah ki Doctor manda heh i rta.
Ong chooh chooh ko wa yaki bru wada heh i rta emkaam u li yah wut wut cha ki Doctor manda ood ki.
Da ong chooh chooh ko wa khnang u yoh yei doh i pran wa chait wa khiah wei u im slem, emkaam leh u pynkhih yei doh i pran, emkaam u baam bha, u thiah heipor, u leh khooid wei u sum man-ka-sngi.
Da pynkut ko deiwa ong wa yoosar i por da toh wa ki bru wa da heh i rta da emkaam i thaw wow yachem para ki khnang yow yoh ki u pynlut yei por u khanatang, u yachem paralok.
U Dr. J. Nongtdu wa pait ya ka OST Center hawa e yei klam da batai u chaphang i emkaam u e i maya yaki tymmen tangwa ha wow yoh ki yei maya emkaam wa haki por wa dang chkeh, u em ka yung ka sem waka imlang sahlang kawa ya maya kawa sñiawthooh yumut.
Da pynsñiaw u yei sñiawkmen wa haki chnong ki thaw yong i wa ki bei ki pa tymmen yong i ym pu hap ki u thiah cha ki thaw ri tymmen neibha kiwa hayung hasem da ri ki ki dei maya da pynbiang pyntoh yaki nadong chadong yei emkam yong ki. Da ong haroh u wa em ki thaw kiwa yaknieh u ri yaki bru tymmen neibhah em i ngait wa manda ri yaki u yoh i kyrkhu. Da ong chooh chooh u wa i man tymmen man ko kam wa ku ya u loom uwa heipor wa ku sñiaw kamwa ngiah bha tangwa manda pait chadien yoo i wa chiboon kiyi kiyi wa dep leh i.
Da pynchlur u ya waroh u man ki kiwa kmen kiwa sñiawbha neibhah man i iwa mynkna tangwa wanrah i i chait i khiah hei im yong i waroh.
Yaki kyntien khublei da yoh naka Milanda Rymbai ORW MCSWA.
Hadien ka yalang da pynman leh ya ka Medical Check Up ha kawa da ki spah ngut ki khon ka chnong da yoh myntoi ki.
