Ka Hill Farmer’s Union (HFU), Thadlaskein Block Unit, West Jaiñtia Hills District da e khublei kyrpang ko ya ki sahep ka chnat Horticulture, West Jaiñtia Hills District nadooh ki wakreh yong ka wa ka Thadlaskein C&RD Block wa da e symbe sapdok, sakhia, kubi wa u sy’in ki cha ki warep.
Neiliang u President ka HFU Thadlaskein Block u Mutshwa Thabah, ha ka sngi wa saam ya ki symbe cha ki warep na ki chnong waphær waphær ka Block, da kyntu u ya ki wow man ki kiwa kreh chitom wei wow rep katkam ka juk katni khnang wow ye u yoh lap bha na i kaam rep.
Da pynchlur u leh ya ki warep wow leh ki katwa ye wow e da ki sboh kyndaw khnang wow yada ya i khyndaw.
Ka chnat Horticulture, da saam ko hadooh 15 Ton u symbe Chyrmit (Lakadong Turmeric) cha ki warep na ki chnong waphær waphær lyngba ka Hill Farmer’s Union Thadladkein Block.
Neiliang u Secretary ka HFU Thadlaskein Block u Chanbor Rymbai, da kyntu u ya ki warep wow pynjooh ki wow thooh ya ki mar rep kiwa rap myntoi rap yoh poisa wei wow rep khlem e dawai wa man bih ya i khyndaw khnang wow im i khyndaw.
Da kyntu u leh ya ki warep wow pyntip cha ki bor ka sorkar lada chah ktah ki mar rep ha ki khñiang wa kiwi kiwi.
