Khnang wa ki warep u ye ki wow kheit rap boon u soh i kreh chitom hei rep i riang, i thung i thep. Ynne ka sngi ka Central Integrated Pest Management Centre Shillong, Meghalaya kam chibynta ka Kharif 2022-2023, da pynman ko yei e sikai wa ar sngi ya ki warep ka West Jaiñtia Hills yow tipmit ki ya ki khñiang wa pynsih ya ki mar rep kamjooh ki khñiang wa e yei yada.
Kani man haroh ko katkam ka thong yong ka sorkar bei lyngba ka Ministry of Agriculture & Farmers Welfare Directorate of Plants Protection, Quarantine & Storage, khnang wa ki warep u tip ki kammon u leh hei rukom wa biang tam hawa thung kamjooh leh u e yada yei jait mar rep.
Ka rukom e sikai toh deiwa yah ya ki warep cha Pynthor Wah (Syntu Ksiar) wei da yabhah leh ya ki ha ki 4 liang.
Kini ki warep kiwa da ya chimbynta da hiar ki cha hali yow jied ya ki jait khñiang, hadien neitæ deiwa yarap ki bru wa pait yeini, da ya dro yei dur u kba ha ka kot sada wei da thoh da booh leh jar jiar ki pyrtuid ki jait khñiang wa da yoh ki u jied hapyrdi kiwa pynsih wa kiwa yada kba.
U Gokulraam M, Plant Protection Officer (E) CIPMC, Shillong Meghalaya kam u bru chemphang yong kani ka e sikai ong u kani toh katæ ka Agroecosystem Analysis namo wow thooh bniah yei long i man ha soodong ki mar rep khnang yow ye u leh yeiwa emkaam neibynta u pynku yei kaam rep.
Chwa ini heipor step da em ka yalang pynsñiawthooh ya ki warep hajrong kani hi ka jooh ka phang ya kawa da pynman ha yung krehkaam u District Agriculture Officer, Jowai wa da emlang nadooh u E.M.H. Passah, District Agriculture Officer najrong kiwi won ki sahep wa kiwa kreh ka chnat Agriculture.
