Ka ICAR National Bureau of Plant Genetics Resources, ICAR -RC NEH, Umiam chirup wa ka KVK, West Jaiñtia Hills ha ka 21 tarik uni u bnai da pynman ki yei e sikai heiwa kammon u pynmih symbe wei kammon wow pynneh ya ki.
Ya kani ka e sikai da pynman ha Ummulong wei da pynlai ya ka da u Dr. H. Rymbai wei da yoh i klam hajrong ka phang na u Dr. J. Uchoi uwa da pynche ya iwa emkaam ki symbe yong i kiwa pynmih hi cha i (Land Races) wei ki rukom pynmih wei wow pynneh pynsah ya ki.
Ka Risakaru Lyngdoh (SMS-Agronomy) da pynche ko chaphang i rukom thung, pynemkaam wei pynmih symbe kre.
Ka Alethea Dympep (SMS-Agric. Ext.) won da pynsñiawthooh ko chaphang ka Custom Hiring Centre wa kiwi ki laad yarap na ka sorkar ya ki warep.
Neiliang ka Marbiangdor Mawlong (SMS-Plant Pathology) ka sikai ko dei pynyoo dur kammon wow pynmih ya ki dawai wa ki laad wow yada ya ki mar rep na ki khñiang wa ki kjut.
Da yoh leh i klam na u Easterious Shylla, Secretary Chnong ka Ummulong uwa da ong wa ki warep toh u pynemkaam hok ki ya i e sikai wa ki laad yarap na ka sorkar.
Ha kani ka sngi da yoh leh wow saam 150 tylli ki wakhu, 150 tylli ki Rose Can, 150 tylli ki Secature, 150 tylli ki rachi wa kiwi ki tiar cha ki 225 ngut ki warep ka chnong Ummulong kiwa poi cha kani ka sngi.
Hawa kut neiliang u Dr. H. Rymbai da e khublei u ya ki warep kiwa da wan chimbynta ha kani ka sngi, ya ki waheh ka chnong kawa da e thaw wow pynman yei sikai, ka ICAR-NBGPGR, ICAR RC-NEH, Umiam wa ka KVK, West Jaiñtia Hills kiwa da smat wow e sikai hawa yatoh wa i rep i riang wa ka kamai kajih ki warep.
