Ynne ka sngi kiwa chet ja-sngi haki skur waphær waphær ka West Jaiñtia Hills District namo ki Cook-Cum-Helper da yoh ki yei sikai kammon u man kiwa lehkhooid hei chet i tu wei wow tip leh ya ki jait baam wa tei yei doh i pran.
Kani ka e sikai haap ko hapoh ka PM POSHAN (Mid Day Meal) Scheme wei da pynlai da ka yung krehkaam ka District School Education Officer, West Jaiñtia Hills ha Ladthadlaboh Indoor Sports Hall, Jowai.
Ki bru chemphang wada wan e sikai kynthup ya ka A.B. Tyngkan, Assistant Commissioner of Food Safety, West Jaiñtia Hills District kawa da klam hajrong ka phang Food Safety waka Mary Pajat, District Extension Educator naka chnat DMHO, West Jaiñtia Hills District kawa da klam hajrong ka Personal Hygiene.
Hawa pynche hajrong ka aiñ yong ka Food Safety and Standard Act 2006 Rule and Regulation 2011, ka A.B.Tyngkan da kdaw ko leh ya ki kyndon wa pynmih ha u 2020 heiwa ki bor pynlai ki skur toh u pynyoo ki haki khynnah yaki jait baam wa khooid wa lait nei maa, kamjooh iwa tei yei doh i pran ki khynnah. Neitæ u pait leh wa la kiwa pynpoi khoo cha ki skur biang Licence hi ki, najrong kiwi ki kyndon wa emkaam u bood.
Chooh chooh ong ko wa em le jait ki baam wa emkaam u pynduna kitæ toh i phñiang, i chini wei blooh neibhah kini man bih ki manda baam boon ware.
Neiliang ka Mary Pajat ong ko emkaam ya kiwa chet ja-skur u sait bha ki yaki tyrsim kti chwa u chet wei u kyntu haroh ki yaki khynnah u sait bha ki yei tyrsim kti chwa u baam wei hadien wa dep, neibhah i tngit wa em ha khap tyrsim toh kiwa boon ki jait khñiang kjut.
Hadien i klam naki bru chemphang da em leh ka bynta e sikai wada pynyoo da ki bru wa dadep chah sikai hajrong kammon u man kiwa pynkhreh ya idæ chwa u chet kamjooh i rukom sait ya u khoo wa ki jhoor.
Chwa ini haka yalang wa pynlai daka C. Lyngdoh, SI of School, DSEO Jowai da yoh i klam naka A.P. Syiem, District School Education Officer Jowai, katwa yei kyntien e khublei da yoh na u Mehiwanjop Dkhar, District MIS Coordinator PM POSHAN.
Discussion about this post