Hajrong kammon u kyntu kynrong yei sap chna kchu khyndaw ha chnong Tyrchang wa Larnai kiwa em ha West Jaiñtia Hills District kamjooh leh heiyatoh i rukom pynlai yaaw, neiliang ka Rural Craft and Engineering Division (RC&E) da pynman ko yaka Marketing and Promotional Workshop kawa haap hapoh ka “Scheme on Studies for Promotion & Strengthening of Black Pottery at Tyrchang and Larnai Village” ya kawa da pynman haki ar sngi ha Tyrchi Inn, Khliehtyrchi, West Jaintia Hills haka 12 wa 13 tarik uni u bnai.
Haka sngi sdang da wan emlang u Joint Director ka Commerce and Industries, Shillong u M.L. Wanshong kam u kongsan wa u General Manager, DCIC, Jowai, u B. Warjri kam u symbood kongsan.
Ya kani da kyrchaan poisa da ka chnat Commerce and Industries (DCI) Shillong, yong ka sorkar jylla wei da pynkrehkaam won da ka Mahatma Gandhi Institute of Rural Industrialization (MGIRI) Wardha, Maharashtra kawa man ka R&D Institute wa haap hapoh ka Ministry MSME, yong ka sorkar India.
Ka thong wa hakhmat dooh yong ka toh yow pynku chooh chooh yei sap tynre hei chna kchu khyndaw yow man iwa lai yaaw, iwa yoh nong, wei u man leh ka laad kamai lyngba kam kani ka karkhana tynre yow yoh khih yoh khan. Neitæ yow pynsñiawthooh leh heiyatoh kammon u pynlai yaaw ya ki tiar najrong kiwi won ki jait sikai.
U Joint Director Commerce & Industries, u M.L. Wanshong hawa klam da e khublei u ya ki bor pynlai wada chim ki ya kani ka bynta, neibhah wa yoo u yei ku myntoi, i chemphang ki bru em sap hei chna kchu khyndaw lyngba ki Exhibition, i daw hi ong u toh wa yoh ki neipor cheipor yei sikai, kamjooh leh wa yohlaad ki u lai sakhi cha ki jylla wa da rap ku hei chna kchu khyndaw kiwa da biang nadooh i yung i sem kamjooh ki kor ki bor.
Kamtæ yooluti u wow nang ye ki u lai chaphrang katkam i buit i stat thymme wa da yoh ki hei rukom waphær waphær khnang yow lait u wiar kamwa da sikai ki warim najrong wow nang ye u pynmih chooh chooh ki tiar wa thymme yow man i im ja, wei u pyrchang yakrehlang leh kam ka kawi ka seiñ khnang yow ye u pynmih chiboon ki tiar wot u chalan cha baar.
U Dr. K. Venkata Rao, Deputy Director Rural Craft and Engineering hawa klam khana u ya ki bynta waphær wa da leh hapoh kani ka Project hapoh i por wa chi snem wei ka MGIRI da pynwandur ko ya kani ka Project haki ar bynta.
Ki bru chemphang wa da e yei klam kynthup i ya u Dr. Annaji Sharma, Professor & Management NIFT, Hyderabad uwa da klam hajrong ka phang ‘The Introduction to Marketing & Markets (Domestic & International) Importance of Branding in Handicraft Industries’, u Siewspah D. Buhroy, Assistant Professor Fashion & Management Studies, NIFT, Shillong, Meghalaya klam u hajrong ka phang ‘Introduction to Digital Marketing’, u Viswanath B Kasi, Founder & Director Inkwisitive Global Advisory Singapore, Hyderabad uwa da klam hajrong ka ‘International Marketing Opportunities, Procedures & Exim Polices’ wa ‘Trends & Opportunities for Indian Handicrafts Business’, u R. S. Nongbri, Assistant Director, Branch MSME, DFO, Shillong da klam u hajrong ka ‘MSME Scheme Support’, u Mondon Lyngdoh, Jr. Executive KVIC, Shillong da klam u hajrong ka ‘Different Schemes of KVIC’.
Kiwi won wa klam toh u H.D. Sinnur, ka S. Kharpran, Functional Manager, DCIC, Jowai wa kiwi de.
Discussion about this post