Ynne ka sngi, ka seiñ wa tip kam ka Unemployed Youth Development Society da yoh ko pynman ya ka pynsñiawthooh paidbah ha ka chnong Laskein deiwa yoh i kyrchaan na ka yung krehkaam u DC ka West Jaiñtia Hills District hapoh ka Chief Minister’s Youth Development Scheme (CMYDS) 2022-23.
Kani ka pynsñiawthooh paidbah da pynman hei dur ka Youth Seminar wow sikai u pynku yei longbru manbru ki khon khynroo kyllood wei da man kam ka chongknor da ka Wailad Wahlang kawa da pynlai ya ka yalang.
Ka Yeima Syngkon kam ka bru wa chemphang da klam ko hajrong i ktah i pep skur chiteiñ por, i chongkha dang khynnah iwa da ktah ya ka imlang sahlang neibhah wym ye ki wow pyndep ya iwa angnood ki yow ye ki u yieñ hei kjat yong ki hi.
Da batai ko leh kammon u leh yei rukom kynchew poisa poilaiñ yow man ki kiwa dap wa biang, da kyntu ko leh ya ki khon khynroo khyllood wa chimbynta yow pyndep yei puræ puthi yong ki iwa da angnood ki khnang wow poi ki cha ka thong.
Neiliang u Optimist Sdor da batai bniah wei da pynchlur u wow yieñ ha ki kjat yong ki deiwa sdang u seiñ khih da iwa khian chwa u yoh u poi cha iwa heh wei ymtoh wow chaniah du ha ki kaam sorkar.
Da klam u leh chaphang kammon wow sumaar u yada ya ka bei ramaw kam ki loom ki wah, ki dieñ ki siej, da kyntu u leh wym hoi u thang khloo khnang yow ye u neh u sah ki sim ki doh, ki dawai ki dachin wei da kyntu u leh wow thung dieñ thung praw khnang wow im ka bei ramaw khnang wow yoh u riñ mynsien da ka la’ær wa khooid ki bru næ ki mrad, kamtæ da pynchlur u leh wow thung dieñ hawa hap u thyllem ya ki dieñ.
Da ya wan wow chimbynta kamwa 40 ngut ki khynroo chynrang wa kynthai kiwa da yoh myntoi na kani ka pynsñiawthooh wei da wan wow sakhi da ki waheh wasian wa kynthup ya u Lasting Suchiang, ka Aidarika Lyngdoh wa u Dialmy Rabon, Executive Member ka chnong.
Ya kiwa wan u chimbynta da e leh ya ki da ki Certificate hachwa u pynkut ya ka yalang wei da yoh leh ya ki kyntien sñiawngooh na u Rimiki Lathong uwa man leh kam u Director ka Society.
Discussion about this post