Ka VDP yong ka chnong Mookympad da yoh ko wow ksoh ya ki 43 ngut ki baar jylla kiwa da wan kit da kawi ka Truck wa em ya u Number AS-25EC-3955 ynne i step ka 5 tarik heipor 7 waje. Hadien wa da takit bniah, da pyntip ki wa da thmu wow lai kreh cha ka karkhana Coke kawa pyrtuid S.K. Coke kawa em ha Nongjri, Elaka Sutnga.
Da pyntip ki wa kani ka Coke toh ka yong u Forgive Dkhar uwa na ka chnong Sutnga.
Ka VDP da pynsñiaw ko yei khyrngiat leh wa kamwa u Forgive Dkhar da khyrngiat u yei lai Rally ki khon ka Elaka ha ka 3 tarik uni u bnai wow pyrchah ya ki karkhana Coke uwa da pynbaad wa da pynkheiñ ki ya ki kyndon yada COVID-19, tangwa hadien wa du chi sngi, u Forgive Dkhar da wanrah syndon u chi Truck da ki bru kiwa na baar jylla na Bongaigaon, Assam kiwa khlem em ya ki kot ki sla kiwa biang.
Da kdaw leh ya ka kyrwoh khubor wa da dep pynlait da u Forgive Dkhar uwa da ong wa ki khon yong ka Elaka ym em yoh bor ki na u DC chwa wow pynman yei lai paidbah, neiliang ka VDP ka kylli ko ya u Forgive wa oo won yoh bor, yoh Permission u næ ym em wow wanrah ya kini ki bru na baar jylla na ki yung krehkaam ka sorkar wa pait ya ini. Na ini i daw ka VDP ka pyrchah ko ya i wanrah ya ki baar jylla cha ki karkhana Coke.
Da ong leh wa kani ka karkhana Coke toh ka wym pu em ki kot ki sla wot ya ka CTE leh tangwa da sdang ko wow thang nadooh kini ki bnai kiwa da dep.
Ha ka 2 tarik uni u bnai, ka VDP ka Mookympad da yoh ko leh wow ksoh ya kawi ka Bus Traveller kawa da kit ya ki phaw ngut ki baar jylla kiwa da thmu wow lai kreh cha kini ki karkhana.
Ka VDP da maham joor ko ya ki tre Coke wym toh u wanrah ya ki baar jylla ki wym biang ya ki kot ki sla. Khamtam ha kam kini ki por wa dang em u khñiang COVID-19, wei lada ka VDP u dang chem ko ya kam kni ki kaam pyrchah aiñ, ka VDP ym yohsa ko wow leh da iwa eh.
Ka kyrwoh na u President u Wa-oo Supooh wa na u Secretary u Demanful Sari, VDP Mookympad, East Jaiñtia Hills District.
