Kawa ye u man ka khubor wa bha ya kiwa khih mooyong ka Ri-loom Jaiñtia khamtam ka East Jaiñtia heiwa neiliang ka sorkar India lyngba ka Ministry of Coal wa khlieh da u Pralhad Joshi kam u Montri, ynne ka 23 tarik da e ko ya ka Mining License yow tih mooyong ha iwi i thaw (Block) u Nehlang Lyngdoh wa ar tylli ki thaw (Block) ki yong u Thomas Nongtdu kiwa man kam ki tre mooyng namo ki tre ki Coal Block.
Ki License kiwa da yoh toh kawi hei pyrtuid u Labour Lyngdoh uwa na ka chnong Rymbai katwa ya ki ar tylli ki Block toh hei pyrtuid u Dapmain Shylla uwa na Byndihati.
Neiliang kini ki arngut da pynsñiaw ki yei sñiawngooh ya u Prime Minister Narendra Modi, ya u Pralhad Joshi kamjooh ya u Conrad Sangma kiwa da ap yei ood kiwa khih mooyong heiwa ynne ka sngi da pynman sakhiat yeiwa angnood ki.
Da pyntip ki leh wa i pynkhreh ya ka Mining Plan daw sdang noh wei da yoo luti wa manda sdang u 2022 kam ha u Wisu (Mar) daw yoh u sdang tih mooyong noh na kini ki 3 tylli ki Block.
Kini ki arngut da ong ki wa i chah khang wow tih mooyong da ktah bha ko ya ki hajar tylli ki manyung ha Meghalaya heiwa ka sorkar Congress warim ym em leh ko iyi iyi leh wow pyndooh ya ini i eh wa chem chitom ki paidbah.
Kamtæ da yaroh ki ya u Montri Rangbah, u Conrad Sangma uwa da chynna jngai wei uwa da kreh chitom wow pyndooh noh ya ini i chah khang wei ynne ka sngi da man ko ka wow sahkynmoo ya ka Ri-loom Jaiñtia.
