Kam chibynta ka National Oral Health Programme & National Tobacco Control Programme, neiliang ka Urban Primary Health Centre Loomkyrwiang chirup i yakrehlang wa ka 100 Bedded MCH Hospital Jowai ha ka 10 tarik da pynman ki ya ka Dental Awareness & Screening Camp heiwa ki manbei manpa deilang ki khynnah dawan ki wow ya chimbynta.
Ha kani ka yalang chwa wow yoh u ap u sñiaw yei klam i batai na ki bru stat bru chemphang ka Health Department, neiliang u Daioolang Pakma, Asst. Waheh Chnong Loomkyrwiang da e u ki kyntien yahkhmat hajrong ka thong yong kani ka yalang wei da kyrsu kyntu joor u ya ki manbei manpa wow yakrehlang wei wow chimkhia ya kam kini ki kabu ksiar kiwa ka chnat krehkaam i chait i khiah wanrah ki hapoh ka chnong ka thaw.
Ka Dr. P. Sohmat, BDS hei klam i batai yong ka da khana ko ya ki rukom wow ye u yada ya ki lamieñ khamtam ha kini ki por ki sngi wa katni wa boon ki khynnah rap smat bha ki u yoh yei baamkhñiang næ kjut lamieñ. Chooh chooh da batai pynyoo ko leh ya ki khynnah kammon i rukom wow kyrchut lamieñ wei kiyi ki jait baam wa ye u wanrah yei chait i khiah ki lamieñ.
Neiliang ka Jane Rymbai, Adolescent Counsellor Health Department da khana ko wa ka chnat krehkaam i chait i khiah ha ka thong wow pynman ya ka imlang sahlang yong ka yung ka sem ka chnong ka thaw kawa miat wa bha wei lait nei tynjooh yong i sih i roi ka pyrthai neidaw i sih wa mih nei drugs wa kiwi ki jait dih pynmuaid, ong ko wa em ki ka bynta wa khroo wow ye u leh yeitæ lada ki manbei manpa næ ka chnong ka thaw kwah ki wow yoh yarap lyngba yong ki.
Chooh chooh ha kani ka sngi ka Dr. P. Sohmat da pynman ko leh ya ka Screening Camp wei da sam ko leh ya ki brut lamieñ deilang i dawai lamieñ cha waroh kiwa wan ya chimbynta katwa neiliang ki bru ka UPHC Loomkyrwiang da pynman ki i e Inject ya ki khynnah.
Discussion about this post