Ka Mihmyntdu Community Social Welfare Association (MSCWA) Khliehriat chirup i ya krehlang waka yung krehkaam u Deputy Commissioner ka East Jaiñtia Hill District lyngba i kyrchaan poisa na ka Chief Minister Youth Development Scheme, ha ka 6 tarik uni u bnai da pynkut ko yei sikai wa mynkna wa le sngi heiyatoh wa ka Food Processing ha DMF Building wa em ha Dieñchynrum, East Jaiñtia Hills.
Ha kani ka sngi pynkut da emlang u Functional Manager ka District Commerce and Industries Center, u G. Pala , u M. Diengdoh, FSO East Jaiñtia Hill wa u Vicky Nelson Manner, Technical Associate Directorate of Food Processing East Jaiñtia Hill.
I thmu hi yong kani ka e sikai toh yow yarap ya ki manbei ki wym em kaam em jaam yow ye ki u yieñ hei kjat yong ki hi, wei heijooh i por leh kammon yow pynemkaam ya ki mar ki mata kiwa mih na ki thaw yong i khnang yow lait ki u man kiwa sepai deiwa pynkylla ya ki cha kiwi tawon ki jait baam kam ki Jam ki umsoh wa kiwi kiwi khnang wa kiwa thied leh u yoh ki yei baam wa paka.
Neiliang u G. Pala hawa e yei klam ha kani ka sngi da e u i yaroh u ya ka MCSWA wa da ye ko pyndep ya kani ka e sikai, wei ngait skhem u leh wa iwon iwon wa yoh na kani ka thaw sikai u pynemkaam hok ki. Da batai u leh chaphang ki jait Scheme wa ye u yoh lyngba ka Office yong oo ya kiwon kiwon kiwa em i pyrkhat u sdang ya kani ka kaam. Da pynkut u deiwa ong hawa sdang ya kawon kawon ka kaam, i kreh chitom wei yaichah man i iwa emkaam bha lada ym em ya kini ki ar jait kawon kawon ka kaam ym ye ki u pynlai chakhmat.
U B. Diengdoh, Food Security Officer ha kani ka sngi da ban bha u yei emkaam u leh khooid hawa pynkhreh ya kiwon kiwon ki jait baam, heijooh i por leh da batai u heiyatoh i emkaam u Register ya idæ hapoh ka FASSAI hawa mut ki wow seiñ khih ya kawon kawon ka jait baam.
Da batai u leh ya ki jait pynchitom wa ye u ngat ha ki kyndon ka aiñ lada chem ya kiwon kiwon kiwa dai ya ki mar kiwa booh hei maa yei chait i khiah kiwa thied. Da pynchlur u leh ya kiwon kiwon kiwa thied lada chem ki wa em wa dai ya ki mar kiwa da sih næ kiwa ktah yei chait i khiah yong kiwa thied, u mih ki chakhmat u lai pyntip cha ki yung krehkaam wa pait yeini i kaam.
Hawa pynkut da e khublei u ya waroh kiwa chah sikai wei kyrkhu kyrdoh u ya ki yow nang ye ki u ku chakhmat ha iwon iwon i kaam wa leh ki.
Ha kini ki le sngi kiwa chah sikai da tip ki kammon u chna Jam, chna Umsoh wa kiwi kiwi de na ki soh kiwa yoh na ka chnong ki thaw yong ki.
Ya ka yalang ha kani ka sngi da pynlai da ka Rinibeth Patlong, Program Manager MCSWA wei da yoh laad leh u lai yah cha ki karkhana pynmih baam wa em ha East Jaiñtia wei da saam leh ya ki Certificate cha waroh kiwa pyndep ya kani ka e sikai.
Discussion about this post