Hajrong ka thong u pynkhlan i chakri neibynta u pynyoh i doh i pran wa chait wa khiah ya ki manbei wa punkhon nadooh i por wa pun yei khonboo hadooh wa toh i por kha, ha ka 24 tarik uni u bnai, ka Amlarem Aspirational Block Programme wa kynthup ya ka ICDS, ka C&RD Block chirup i yakrehlang ka Directorate of Health Services (MCH&FW) da pynman ki ya ka Special Antenatal Care (ANC) Health Camp ha Syiem Jingsuk Hall Amlarem.
Ha kani ka Health Camp boon ki manbei ka thaaiñ Amlarem da wan ki chakhmat u phah pait bniah yei chait i khiah yong ki najrong wa chimbynta haroh ki ha ka yalang batai pynsñiawthooh bniah hajrong kammon u sumaar ki ya idæ kamjooh yei khonboo.
Ya kani ka Special Antenatal Care (ANC) Health Camp da wan wow wai da u Lahkmen Rymbui, MLA ka Amlarem Constituency uwa man leh uwa e buit ka sorkar jylla, hei emlang ka A. Raajhsshre, SDO Amlarem Civil Sub-Division, ka Dr. N. Kharsahnoh, DHS MCH&FW cum Joint MD NHM, u Dr. D. Lyngdoh, BDO Amlarem Block, ka Dr. H.J. Uriah DM&CHO najrong kiwi won ki Doctor, ki ASHA, kiwa chah khut sñiawbha wa kiwi.
U Dr. A. Khonglah Sub-Division Medical & Health Officer cum BMO Amlarem, hawa pynsñiaw yei lai luti ki hapoh ka thaaiñ Amlarem yow e chakri lyngba i chait i khiah wei lyngba i ya krehlang waka Meghalaya Health Strengthening Project (MHSSP) yarap ko nadooh u pynbiang ki thaw e sumaar waphær waphær iwa daw man chooh chooh i yarap wa khroo u pynku yei chait i khiah.
Neiliang ka Dr. N. Kharsahnoh DHS MCH&FW cum Joint MD NHM kyntu ko ya ki manbei wa punkhon wow smat wan mih cha ki thaw e sumaar nadooh ki bnai wa sdang pun khnang wa ka bei deilang i khonboo u yoh ki ka laad yada wei yow kha suk.
Ban joor haroh ko wow ya sneiñ ya kyntulang hajrong i ktah nei yoh khon dang khian rta, wa i yoh khon boon ngut man-u-snem.
U Lahkmen Rymbui, MLA ka Amlarem won hawa e yei klam kam u kongsan, ong u haka thong u yakhun pynduna yei khlaad ki manbei wa ki khonboo wa dangkha, neilang ka sorkar jylla hapoh i yahkhmat u Montri Rangbah da thooh ko ki laad kammon wow pynku yei chait i khiah, wei na ini i daw ha u snem 2021 da wanrah ya ka State Health Policy kawa kynthup ya chiboon ki bynta wa yatoh wei bha i miat yong i chait i khiah.
Ong u wa kani ka sorkar hapoh 7 snem ym du wa chimkhia ko u pynbiang dawai tangwa wot u pynbiang ki Doctor kamjooh ki Scheme e yarap cha ki paidbah.
Hanla kattæ leh iwi iwa pynsñiawsih ya oo toh wa dang boon won ki paidbah hadooh kattæ ym pu em chondur MHIS ki, deiwa e nongmuna ya ki paidbah hapoh ka Constituency yong oo hi kiwa chem chitom manda lai thiah kjut cha ki Hospital neidaw wym em MHIS ki.
Ong u kynmoo wa i yarap wa jan wa smat tam hawa kjut chitom toh na ka Card MHIS kamtæ ki paidbah toh u chimkhia ya kam kani ka laad ka kabu wa ka sorkar wanrah kyrpang ko neibynta i myntoi yong ki hi.
Da pynrap haroh u deiwa ong, mih na kani ka Health Camp ha deilang i em kitkhlieh neibynta i chait i khiah yong idæ, wei wow rah Wyrta haroh cha kiwi tawon.
Waroh kiwa klam nadooh ka A. Raajhsshre, SDO Amlarem Civil Sub-Division, u Dr. D. Lyngdoh, BDO Amlarem Block kyntu joor ki ya ki manbei wow chimkhia ki u bood katkam wa batai ki Doctor.
Da pynchongchit ya kani ka sngi da i rwai na ka SHG wa i rwai kyrpang hajrong kani ka sngi na u Banker Kharkongor.
Discussion about this post