Jowai: Ka seiñ Fight Against Corruption Team (FACT) ka sñiaw lynngoh ko wow yoh yutip wa ka Jaiñtia Hills Autonomous District Council JHADC booh ko ya ki khyrdop wow sylli yaki Trading License ki baar jylla kiwa wan wow khayi hapoh u pood u ang ka ri-loom Jaiñtia tangwa katkam wa mih ha ka RTI da sakhi wa ya kitai ki khyrdop da e wai noh cha ki bru samen ha i dor T. 32,00,100 neibynta le snem katkam wa yasoi hapyrdi ka Council wa uwa chim wai ya kitai ki khyrdop, chooh chooh ym em leh kawon kawon ka Committee kawa da chna kyrpang daka Executive Committee warim hapoh i yahkhmat u Moonlight Pariat kam u CEM ha kitu ki por wow booh ya kitai ki khyrdop.
Neiliang ka FACT da pynsñiaw ko leh yei sñiawphylla wa hadooh katni kiwa pynlai yong kitai ki khyrdop ym pu em e yukheiñ næ pyntip cha ka Council wa hadooh katwon tylli ki kari wa yoh kem ki kiwa ym em yaki Trading License wei kammon da leh ya kam kitæ ki kari, heiwa haka kyndon da kdaw leh wa kiwa chimwai yaka khyrdop toh u chim ki T. 200 na kawi ka kari, wei ye wow ong wa i booh ya kitai ki khyrdop toh kawa pynmyntoi ya uwa chim wai wa ya ki kattu katni ki MDC warim kiwa embynta wow pynlai ya kitai ki khyrdop wei ym toh yaka Council.
U Convener ka FACT u WN Dkhar da ong u wa lada chim yukheiñ malu mala ki kari kiwa lai lyngba kitai ki khyrdop ym duna ki yaka 1000 tylli haka chi sngi iwa da poi (1000×Rs200=Rs100,000) iwa mut wa kawi ka khyrdop ka kamai da kammon kammon chi lakh chi sngi wei haka chi bnai da kamai ko T. 30,00,000 tangwa da su won cha ka Council du T. 32,00,100 nei bynta le snem hawa kamni cheiwon u poi ka JHADC wei yei yi u kynnoh.
Discussion about this post