Ka Entrepreneurship Development Centre (EDC) ka Kiang Nangbah Government College (KNGC), Jowai da ye ko wow pyndep ya ka e sikai wa chi tayaaw kawa tip kam ka Entrepreneurship Development Programme (EDP) kawa man leh ka sien wa ar namo ka 2nd Batch neibynta kiwa seiñ khih kawa da pynman nadooh ka 4 tarik uni u bnai.
Ha kani ka e sikai da wan wow chimbynta 10 ngut kiwa na East wa West Jaiñtia Hills wa kynthup ya kiwa dang lai puræ kamjooh kiwa da em khih em khan heiwa da sikai ya ki kammon wow pynheh pynsan yei khih i khan kamjooh wow pynkhreh ya ka Business Plan wei kammon wow sdang yei khih i khan.
Ha kani ka EDP da wan wow e sikai da ki bru wa chemphang kiwa da batai chaphang ka Enterprise Development, Financial Literacy, Business Planning, Business Development Model, Market Research, Human Resource Management, Digital Marketing, Branding, Social Media & Mobile Commerce hadooh ki Scheme sorkar wa e yarap.
Kiwa chah sikai da yoh ki leh wow yachem wei yaklam wa kiwa tip bniah chaphang ki jait kreh wa boon jait, ki bru kiwa da hoi khih hoi khan kiwa da khana chaphang kiwa boon ki buit ki budia kammon wow leh yow jop i khih i khan iwa da e mynsien ya kiwa chimbynta.
Hadien wa pyndep yei sikai, kiwa chimbynta da wanrah ki da ki jar jiar ki Business Plan heiwa da jubab wei ya kylli kylliang ki yow pynpliah chooh chooh yei buit seiñ khih ki.
Ka e sikai kam kani ka jooh kawa chi tayaaw u sdang ko nadooh ka 11 tarik uni u bnai neibynta ki 3rd Batch.
Discussion about this post