Ka Pt. Deen Dayal Upadhyay Community College and Skill Development Centre, Wahiajer kawa man ka chnat yong ka North-Eastern Hill University (NEHU), ha ka 13 tarik uni u bnai da pynkut ko yei e sikai wa 6 sngi heiyatoh wa ka “Poultry & Piggery Farming” heiwa da em palat 100 ngut kiwa da yoh sikai na kylleiñ ka ri-loom Jaiñtia.
Ha ka yalang pynkup burom ya kiwa da pyndep yei chah sikai da emlang u Dr. Pynhunlang Blah War, Deputy Director (Planning), Directorate of Animal Husbandry and Veterinary ka sorkar Meghalaya uwa man kam u kongsan, ka D.V. Lyngdoh, ADC kawa man leh kam ka CEO ka Jowai Municipal Board, kam ka symbood kongsan hei emlang u Dr. F. R. Sumer, Principal I/c, DDUCC, u Dr. Rimiki Suchiang, Technical Expert, Animal Husbandry & Veterinary, KVK, West Jaiñtia Hills District, u Ioanis Lyngdoh uwa man kam u Resource Person (Piggery), u Foster Kharsohnoh Trainer (Poultry), neitæ da emlang u Sanwotki Laloo, waheh chnong ka Wahiajer wa kiwi.
U Dr. Blah War hawa e yei klam da sñiawngooh u yei chim ka DDUCC kam kani ka laad e sikai wa phær neibynta ki khon khynroo khyllood yow ye ki u seiñ khih seiñ khan, neibhah wa kani ka kaam ri syiar ri sniang man ko kawa emkaam wei kordor bha khamtam cha ki thaw wa em cha palatsor najrong wa man ko kam ka laad yoh khih yoh khan ya ki warep.
Da kyntu u ya kiwa chah sikai wow pynemkaam hok yei tip i stat wa yoh ki hajrong i bynta waphær waphær iwa yatoh wei kaam ri syiar ri sniang.
Da ban joor u yei emkaam u paitbniah yei man i long ki yaaw ki haat wei wow pyntikna wa ka i pyndap baam u man ko kawa tikna wei kawa yoh myntoi.
Da pynchlur u ya kiwa chimbynta wow psiah ki cha kini ki kaam khayi pateiñ yow ye ki u kyrchaan ya idæ kamjooh ya ka imlang sahlang deiwa pynemkaam da ki tiar thymme katkam wa yah juk wa katni.
Ka D.V. Lyngdoh hawa klam da yaroh ko yei pyrchang ka NEHU wa ka DDUCC wow kyrchaan yei emkaam yong ki paidbah warep wa ki khon khynroo ka Jaiñtia iwa man katkam i thmu yong ka sorkar. Da e buit ko ya kiwa chah sikai wow chim ki yei rukom krehkaam heitæ i rukom wow pynneh pynsah yei khooid ka ramaw. Da pynchlur ko leh ya kiwa chimbynta wow pynemkaam hok yei stat wa yoh ki na kani ka chlem e sikai yow nang ku ki hei kaam yong ki.
U Sanwotki Laloo da e yaroh u ya ka NEHU kamjooh ya ka DDUCC wa da ye ki u pynman biang ya kani ka e sikai kawa jop neibynta i yoh myntoi ki jaitbru yong ka chnong Wahiajer wa kiwi tawon kiwa wan na kylleiñ ka ri Jaiñtia.
Da yaroh u leh yei thmu yong ka DDUCC wow wanrah chiboon ki jait e sikai kamwa emkaam ka imlang sahlang wei katkam i dawa ka juk katni.
Chooh chooh ong u ini i thmu man i kam chibynta i e kti wa rap yillu yong ka DDUCC/NEHU neibynta u pynku yei tip i stat i roi i paar ha ki bynta waphær waphær iwa man leh chibynta ka NEP 2020, kawa man leh i thrang i angnood u (L) Pandit Deen Dayal Upadhyay.
Da pynkut ya kani ka yalang deiwa saam ya ki Certificate cha kiwa chimbynta katwa yei kyntien e khublei da yoh na u Wolnish Rymbai, Program Coordinator NEHU.
Discussion about this post