Palat 200 ngut ki khynnah skur na kylleiñ ka West Jaiñtia Hills District da yoh myntoi ki deiwa chimbynta ha ka Winter Camp wa 3 sngi kawa da e pyrtuid “Spectrum of Life” hajrong ka phang pyrdi “The future is yours” wei da pynman yaka da ka yung krehkaam u District Planning Officer, West Jaiñtia Hills deilang wa kiwi ki chnat sorkar wa ki NGO.
Ki kynnah wa da chimbynta toh kiwa jied mar 5 ngut na ki 40 tylli ki skur kiwa em cha sor wa cha palatsor ka West Jaintia Hills.
Ya kani ka Winter Camp da pynman ha North East Adventist University, Khliehtyrchi nadooh ka 29 tarik u Khonchonglad hadooh ynne ka 1 tarik heiwa da wan wai yaka da u Wailadmiki Shylla, MLA ka Jowai Constituency uwa da pynchlur ya ki khynnah wow bood yeiwa thrang ki.
Kam chibynta kani ka Camp da pynman yei lai kjat na NEAU Campus chah nan Thadlaskein deiwa jied jhep ha tymbud luti.
Manda poi ha kani ka nan, neiliang u H.H. Mohrmen, SURE da khana u yei parom u Sajar Nangli wei kammon da tih ya kani ka nan Thadlaskein.
Heipor step, da pynman yei leh Zumba wa Yoga wei da em leh ki dkhot ka Bharat Scouts and Guides kiwa chimbynta. Kiwi de ki yalang wa da pynman toh yow klam chaphang ka Social Media yow tip kammon u pynemkaam ka yow lait nei chah chim kabu wei chah lehbeiñ. U Mohrmen da klam u leh chaphang i kylla ka suiñ bneiñ wa i ku i chit hapoh ka pyrthai.
Da wan wow chimbynta leh wa u Daniel L. Gatphoh uwa na Jowai uwa man kam uwa chondur wa uwa riñ dur uwa da khana kammon deiwa sikai u pyn ya oo hi da ye u wow khih u khan ha kani ka kaam iwa da e mynsien bha ya ki khynnah. Da khana u leh kammon wow khana parom ha ki Social Media da ki dur kamjooh ki Video.
Da wan leh wow chibynta da ki dkhot ka Chi Iung kiwa da yaklam wa ki khynnah wei da yoh laad ki khynnah leh wow yaklam wa kiwa de kiwa bna naam kam ka Simi Kongthiang kawa chna phlim, ka Irene Dkhar kawa jooh man kam ka Miss Meghalaya wa Miss North East, neitæ u Eugene Lyngdoh uwa yalahehbol wa pawnaam ka jylla deilang wa kiwi de.
Ha ka sngi pynkut, neilang ka yung krehkaam u District Skill Development Officer deilang wa kiwa e sikai da pynyoo ki ya kiwa boon ki jait sikai namo ki Skill Training kiwa da pyndep ki deiwa wanrah leh ya ki mar wa da pynmih wa da chna ki. `
Da em leh ki yakob wa da pynman ha kini ki 3 sngi heiwa kiwa jop da yoh ki ya ki khusnaam.
Discussion about this post