Ka Transparency International (TI) kawa man kam ka seiñbhalang namo NGO wa sdang ha ri Germany ha u snem 1993 da i thong wow yaleh pyrchah ya ki kaam baamtooh ha waroh kawi ka pyrthai da pynmih ko ya ki Global Corruption Barometer wa ka Corruption Perception Index na ki snem cha ki snem heiwa ha uni u snem ha ka thaiñ Asia Pacific kiwa kynthup ya ki ri nadooh na New Zealand hadooh Afghanistan, kani ka seiñ da pynman ko ka sylli (Survey) heiwa da klam ki ya 20,000 ngut ki bru ha ki 16 tylli ki ri yow chem kawon toh kawa khlan dooh ha ki kaam baamtooh.
Kani ka Survey da chimpor u leh 18 bnai wei da pynbna paidbah ya ka ha u Wisu uni u snem. Da chem wa boon ha ki por ki paidbah khamtam kiwa 35 snem cha poh kiwa kynthup 34% toh kiwa chah ktah dooh katwa kiwa 55 snem chaneiñ kamwa 19% haap pynbaam tyngka ki.
Katkam i chem na kiwa yaklam ka Transparency International 30% toh ki chynrang wa haap pynbaam tyngka wa 27% won toh ki kynthai.
Ha kiwa boon ki thaw da chem wa haap bait u pynbaam tyngka ha ki kaam puræ puthi, ki thaw sumaar bru sorkar, yow yoh ya ki ID, ki permit wa kiwi wa e ka sorkar, heipor wa paan yow yoh u pyndait light u rin um wa kiwi kiwi, da su poisa leh cha ki pulit hadooh ha ki yung bichaar.
Heini ha wah toh kiwa wan ha ka kyrdan wa 5 hadooh nyngkong dooh katkam wa chem ka Transparency International.
5. Myanmar: 40% haap pynbaam tyngka
Hanlada ha u snem 2013 da pynmih ya ka aiñ Anti-Corruption Law, kamwa chiteiñ na ki paidbah ngait ki wa ki pulit waka yung bichaar toh kiwa baamtooh dooh.
4. Pakistan: 40% haap pynbaam tyngka
Hapoh Pakistan kiwa chimbynta ha kani ka Survey kamwa 3 na 4 ngut da ong ki wa ki pulit toh kiwa khlan dooh u baamtooh wei hei chem ki 7 ngut na ki 10 ngut yow lait na ki pulit wa na ka yungbichaar da haap pynbaam tyngka bait ki. Boon leh ngait ki wa ki bru paidbah ym ye ki u leh iyi iyi leh hei yatoh wa ini.
3. Thailand: 41% haap pynbaam tyngka
Ka ri Thailand da boon sien wa haap ki sorkar ki hei chah pynbaad ki ha ki kaam baamtooh hadooh wa katni leh dang synchaar da ka Military Rule ya ka. Tangwa hanla kattæ boon ki Thai kamwa 72% nagit ki wa kiwa em heibor katni da pyrchang ki u leh katwa ye ki yow pyndooh ya ki kaam baam tooh.
2. Vietnam: 65% haap pynbaam tyngka
Boon na kiwa chong chnong ka ri Vietnam ong ki wa ki kaam baam tooh da man ki i kjut hapoh ka ri yong ki. Kamwa 60% ngait ki wa ka sorkar ym leh ko iyi iyi leh wow pyndooh jait ya ini i kaam.
1. India: 69% haap pynbaam tyngka
Hapoh India awjan ha waroh ki yung krehkaam ka sorkar ki paidbah da haap bait ki u pynbaam tyngka yow pyndep yei kaam yong ki. Hanlada kattæ leh 53% ki bru ngait ki wa da leh ka sorkar yeiwa emkaam yow pynduna ya ki kaam baamsap. Ki paidbah leh sñiaw em kyrmen ki heiwa hadooh 63% ngait ki wa ki paidbah ye ki u yaleh pyrchah ya ini roi ki kaam baam tooh.
Ka ri wa duna dooh hapoh ka Asia Pacific wa hap u pynbaam tyngka toh ka Japan kawa yoh 0.2% katkam wa chem ka Transparency International.
Discussion about this post