Ki bor Election ka jylla Meghalaya da thoh ki cha ki seiñ saiñhima wym toh u pynemkaam ya ki khynnah heipor Election heiwa ka District Election Officer ka East Khasi Hills da phah Notice ko cha 9 tylli ki Political Party.
Katkam kani ka Notice da ong wa ha kani ka Election MLA kawa dang dep da yoh ujor wa da em ki Party kiwa da pynemkaam ya ki khynnah heipor wa lai yalap Election, ha ki lai paidbah wei hawa ya kbai paidbah wa ha kiwi de kam kini ki jait kaam.
Da pynkynmoo wa da dep wow khang yei pynemkaam ya ki khynnah heipor wa yalap Election da ka National Commission for Protection of Child Rights haka 20-01-17 wei da ka Election Commission of India ha ka 21-02-17.
Kamtæ da ong wa deiwa pyrkhat ya ka Election MDC ha u 2024 kamjooh leh ka Election Lok Sabha, da emkaam wow pynkynmoo cha ki seiñ saiñhima wow bood ki ya kini ki kyndon dei wym toh u pynemkaam ya ki khynnah hawa lai yalap Election wei ki wym bood yeini daw chah pynchitom ki katkam ki kyndon ka aiñ.
Ki Party kiwa da yoh ya kani ka Notice toh ka National People’s Party (NPP), ka Voice of the People Party (VPP), ka Indian National Congress (INC), Hill State People Democratic Party (HSPDP), People’s Democratic Front (PDF), United Democratic Party (UDP), ka All India Trinamool Congress (AITC), ka Bharatiya Janata Party (BJP) waka Khun Hynniewtrep National Awakening Movement (KHNAM).
Discussion about this post