U Swami Sivananda uwa em 125 snem i rta da man u uwa da heh rta dooh wow yoh ya ka Padma Shri Award kawa da pdiang u ynnin ka sngi na u President ka ri u Ram Nath Kovind deiwa emlang u Montri Rangbahdooh ka ri, u Narendra Modi ha Darbar Hall ka Rashtrapati Bhavan, Delhi.
U Swami Sivanda da wan pdiang u ya ka khusnaam yong oo deiwa riam da ka Kurta wa Dhoti wei da lai ngooh chwa u ya u Modi wa kamjooh ya u President chwa wow chim u ya ka khusnaam yong oo heiwa yieñ thap kti waroh kiwa da emlang wow yoo yeini.
Ya u Swami da kha ha u Naisaphra 1896 ha Sylhet iwa katni da em cha Bangladesh wei da ong u wa i daw wa im slem u toh neidaw wa leh Yoga u.
U Swami Sivanda leh toh u wym em khon, ym em kurim wei da dooh u ya ka bei wa u pa heipor wa em u dang 6 snem tangwa neidaw wa joor i ban i dooh i duk, ka bei u pa u da ye ki wow e baam ya oo du i ja suda.
Hadien wa khlaad ka bei wa u pa u, da yah ya oo cha ka Ashram u Guru yong oo ha Nabadwip ha West Bengal heiwa u Guru Omarananda Goswami da pynheh pynsan wei da e sikai u ya oo ha ka niam ka rukom kamjooh ka Yoga.
U Swami Sivananda da pynlut u la 50 snem wow kreh wa ki bru wa yoh Nianglyngkhut ha Puri, Odisha kamjooh ki wakhrong kiwa chah ktah ha ini i kjut deiwa pynbiang baam, ki sula, ki kymmor, ki kchu chet deiwa ong wa kheiñ u ya kini ki bru kam ki Blai.
U Swami Sivananda da ong u, “Ka pyrthai toh i yung yong nga, ki bru yong ka toh ki bei ki pa yong nga wei u maya wei wow chakri toh ka niam yong nga.”
Katkam ka kyrwoh naka Rashtrapti Bhavan, u Swami dang ye u wow yieñ dei bor yong oo hi yow leh Yoga wei da khai thiah u man-ka-sngi dang le waje i step wei im u deiwa leh khian deiwa thiah ha khyndaw wei da pynemkaam u da u dieñ kam ka syngkhlieh. Da man u leh uwa chait wei u wym em hap u dih dawai.
