Yoh Patron wa u President thymme ka Meghalaya Bharat Scouts & Guides

Shillong: Ka Meghalaya Bharat Scouts & Guides (MBSG) ynne ka sngi da pynkup ko ya u lat ka jylla u Banwarilal Purohit kam u Patron katwa ya u Chief Secretary ka jylla, u Y. Tsering kam u President (MBSG) ha ka yalang wa pynman ha Raj Bhavan, Shillong hei emlang u State Chief Commissioner, MBSG & Principal Secretary, Education, u D.P. Wahlang, Principal Secretary to the Governor of Meghalaya, u K. N. Kumar, Vice President, MBSG and Commissioner & Secretary, Home (Police), u E. P. Kharbhih wa kiwi kiwi.

Kam u Patron ka MBSG, u Banwarilal Purohit da ong u wa i thong wa kongsan dooh wa sdang ya ka Scouts & Guides toh yow pynkhreh ya ki khynnah chynrang wa kynthai ki wow kreh neibynta ka imlang sahlang khlem pyrkhat yei yong ki samen. Da khut u leh ya kiwi kiwa em ya kam ini i mynsien wow psiah ki cha kani ka kaam wa bha yow pynkhlan chooh chooh ya ka hapoh ka jylla wa ka ri waroh ka wi.

Ha kani ka sngi u State Training Commissioner (Scouts), u Gary James da yoh u da ka Professional Scout Medallion. U Gary James toh uwa nyngkong dooh yong ka 50^th Basic Management Course na India wa yoh ya kani ka naam. Ya kani ka Professional Scout Medallion toh kawa e da ka World Scout Bureau – Asia Pacific Region Support Centre cha ki Scout wa pyndep ya ka Basic Management Course ha ki kaam Scout.

Ka khusnaam Hon’ble Charge of Leader Trainer (Guides) da e cha ka State Training Commissioner (Guides), ka W. Tariang & District Training Commissioner (Guides), East Khasi Hills wa cha ka wa sikai ha St. John’s School, Laban ka M. Lyngdoh. Kani ka khusnaam Hon’ble Charge of Leader Trainer toh ka naam wa ha khlieh dooh wa e cha ki Trainer ha ka Scouting wa Guiding kiwa ye u esikai leh ya ki Adult Leaders. Kani ka Hon’ble Charge toh kawa da e da ka National Training Centre – Pachmarhi, Madhya Pradesh.