Ynnin ka sngi ka Dikari Bonnie Lamare kawa man ka khon yong u Damekit Khonglah wa ka Lahairoi Lamare kiwa chong wa sah ha Ladthadlaboh, Jowai, West Jaiñtia Hills da yoh ko ya i kyrdan PhD na ka skurbah North-Eastern Hill University (NEHU) Tura Campus hadien wa pyndep ko ya i puræ hajrong ka phang “The Study of the Romantic Outsider in the Select Works of Hermann Hesse” hapoh i pait i pynlai ka Dr. LK Gracy.
Ka Dikari da lai skur ko ha Seven Set School, Shillong wei da pyndep ko ya ka SSLC ha u snem 2006 katwa ya ka HSSLC da puræ ko ha St. Mary’s College, Shillong wei da pyndep ko ha u 2008.
Da pyndep ko ya ka Bachelor of Arts na St. Mary’s College, Shillong ha u snem 2011 wei ya ka Master of Arts na North-Eastern Hill University, Tura Campus, Tura ha u 2013.
Neiliang ka Dikari da e khublei ko ya u Blai uwa da kyrkhu ya ka wa ya ka Dr. LK Gracy kawa da yahluti ya ka ha ini i puræ bniah (Research) wei da e khublei ko leh ya ka bei wa ya u pa yong ka kamjooh kiwa hayung waroh kiwa da kyrchaan wei da pynchlur wei e mynsien ya ka waroh chi kattu.
