Ka sorkar India da mang poisa ko T. 93.58 klur neibynta u sarok Jowai By-pass uwa daw pynyabi ya u sarok NH 40-E ha i bynta wa 214 Km wa u NH-44 ha i bynta wa 58.210 Km wei kani ka poisa kynthup ko leh wow chna ya ki yingkieñ.
Uni toh u sarok wa jrong 5.915 Km na Khliehtyrshi cha Treiongriang daw pynduna u yei khynnia ka chnong Jowai heiwa ki kari wa mut wow lai cha Amlarem, Dawki wa kiwi kiwi ki thaw ym hap de ki wow psiah na Jowai khamtam ki kari wa heh daw ye ki wow pynemkaam ya uni u sarok.
Neiliang u MLA ka Jowai u Wailadmiki Shylla da pynsñiaw u yei sñiawngooh yaka sorkar MDA hapoh i yahkhmat u Montri Rangbah u Conrad K Sangma kamjooh yaka Public Works Department (PWD) ya i kreh chitom yong ki wow pynyoh ya uni u sarok naka Ministry of Road Transport & Highway.
