Ka Ministry of Home Affairs da pynbna ko ya ka President’s Medal for Gallantry, ka President’s Medal for Distinguished Services waka Gallantry Medal and Meritorious Services Medals cha ki pulit ka Fire Services, Civil Defence & Home Guards kamwa jooh leh ha man-ki-sngi Republic Day wa Independence Day man-u-snem.
Kamtæ ha kani ka Independence Day, 2022, da jied ya 55 ngut ki wow yoh ya ka Fire Service Medal wei na kini ya ka Fire Service Medal for Gallantry da e cha ki 11 ngut neibynta ki kaam wa chlur yong ki.
Ya ka President’s Fire Service Medal for Distinguished Service da e cha 6 ngut wei ka Fire Service Medal for Meritorious Service da e cha 38 ngut.
Da em leh 46 ngut kiwa da yoh ya ka Home Guard & Civil Defence Medals ha kani ka Independence Day, 2022. Na kini da e ya ka Home Guards & Civil Defence Medal for Gallantry cha ki 2 ngut neibynta ki kaam wa chlur yong ki.
Ka President’s Home Guards and Civil Defence Medal for Distinguished Service da e cha 7 ngut katwa ka Home Guards and Civil Defence Medal for Meritorious Service da e cha 37 ngut.
Na Meghalaya da em ar ngut kiwa yoh ya ka Home Guards & Civil Defence Medal For Meritorious Service, kitæ u Kharnesh A. Sangma, Sub-Inspector (HG) wa u Thimothy Marbaniang, Havildar (HG).
Ka Ministry of Home Affairs da pynbna ko leh ya ka Correctional Service Medals neibynta ki pulit wa kreh ha ki patok kam chibynta ka Independence Day, 2022.
Kani toh kawa da yabhah ha ki ar kyrdan kitæ ka President’s Correctional Service Medal for Distinguished Service wa em 7 ngut kiwa yoh wa ka Correctional Service Medal for Meritorious Service wa em 38 ngut kiwa yoh.
Na Meghalaya da mynjur ka President ka ri yei pyrtuid ki ar ngut kiwa yoh ya ka Correctional Service Medals for Meritorious Service kitæ u Sushil Baruah-Warder- Meghalaya wa u Pranab Kr. Das-Assistant Superintendent-Meghalaya.
