Hachwa wow sdang yei e dawai tika yow yada na u khñiang khlam COVID-19 iwa tip leh i Vaccine neibynta ki bru paidbah, ynnin ka sngi neiliang ka chnat i chait i khiah lyngba ka yung krehkaam u District Medical and Health Officer (DM&HO), West Jaiñtia Hills da khut ko ya ki heh wa yahkhmat ki niam waphær waphær wa kiwa thoh khubor chaka yalang wow pynsñiawthooh hajrong i e dawai COVID-19 Vaccine, neidaw wa sñiawthooh ki wa kam kiwa yahkhmat niam wa kiwa thoh khubor em ki ka bynta wa khroo wow pynsñiawthooh ya ki paidbah.
Haka yalang pynsñiawthooh da em ka Dr. E. Challam Additional DM&HO, ka Dr. M. Syngkon District Maternal & Child Health Officer, kawa man leh kam ka District Immunisation Officer wa u W. Lyngdoh IEC Manager DM&HO.
Neiliang ka Dr. M. Syngkon hawa pynche ko hajrong i COVID-19 Vaccine deiwa pyntip ko wa kitu kiwa hapoh 18 snem i rta, ki kynthai wa punkhon wa kiwa dang e bu ym pu ye ki wow yoh ya ini i dawai.
Ki bru wa jooh yoh chitom malu mala (Reaction) hawa baam ya iwon iwon i baam, hawa dih dawai næ hawa yoh ya kawon kawon ka tika, kam kini ki bru leh ym hoi u chim ki ya kani ka tika.
Ym hoi leh u chim tika heipor wym sñiaw chait, hap u yang ki hadien wada chait bha.
Katwa ki bru wa em kjut klongsnam, TB, ki snier, man iwa miat yaki u chim ya kani ka tika neibhah yarap ko wow e yada.
Chooh chooh da ong, kamwa manlang kiwi tawon ki dawai e tika, ye hi wow em ki bru wow chah ktah (Side Effect) kam i kjut doh, i ìñdoh malu mala lane kynroi prai tangwa hadien chisngi arsngi kini daw wiar ki.
Ka Dr. M. Syngkon pyntip haroh ko wa i e tika (Injection) chong ko hei mon laitlooid yong uwi pa uwi, tangwa hanla kattæ leh da kyntu ko yaki paidbah wow wan ki chakhmat neibhah ym toh iwa maa yei chait i khiah yong ki.
Hadien ini, neiliang u W. Lyngdoh IEC Manager DM&HO da klam u hajrong i kamram yong kiwa yahkhmat yaki niam wa i kamram kiwa thoh khubor.
Da ong leh wa ini dang toh i sdang wei neini chakhmat daw pteiñ chooh yei pynsñiawthooh khnang yow lait ki paidbah nei artatien.
