Ki pulit ka East Garo Hills ynne ka sngi deiwa yarap ki pulit ka North Garo Hills wa ki pulit ka Assam da pynman ki yei thooh ha ki thaaiñ Gabil Bi.sa wa em ha khappood ka North Garo Hills.
Ya ini da leh hadien wa ha ka 12 tarik uni u bnai da pyntip da u SP ka Goalpara wa uwi u bru wa tip kam u Robiul Islam uwa na Goalpara da chah rah bor wei da ksoh ya oo ha ki thaaiñ Rongmil wa haap hapoh ka Rongjeng PS ka East Garo Hills District.
Kamtæ ki pulit na Assam da poi ki ha Rongmil hei pyrdi synyaw ka 12 tarik wei deilang wa ki pulit ka East Garo Hills da sdang ki wow thooh ya u Robiul Islam.
Ynne ka sngi heipor kamwa 9 waje i miet, da pynlait ya u Robiul Islam da kiwa rahbor ya oo ha Chikal Pekro wa em hapoh ka Rongmil Operational Group Centre.
Hadien wa leh yeiwa emkaam, da e kti ya u Roibul cha ki pulit ka Assam wa kiwa hayung yong oo.
Heiyatoh wa ini i kaam, ki pulit da kem ki ya uwi uwa tip kam u Bronson Momin uwa da suba wa emkti ha ini i kaam.
