I yaleh ka India wow yada ya ki rood duriaw wa ya kiwa em wa kiwa im ha ki da yoh biang yei tipmit hapoh ka pyrthai deiwa em sa ar tylli ki Beach wa yoh yei naam “Blue Flag”, kitæ ka Minicoy Thundi Beach waka Kadmat Beach kiwa waroh ar wa em ha Lakshadweep. Wei wa kini da em kattu waroh 12 tylli ki Beach wa yoh ya ka Blue Flag Certification.
Hawa pynbna ya ini, u Montri ka Environment, Forest and Climate Change, u Bhupender Yadav da pynsñiaw u yei kmen wow yoh ya ini i tipmit yei kreh chitom ka ri.
Ka Thundi Beach man ko ka wi na ki Beach wa khooid dooh ha ki ‘dawlynnong ka Lakshadweep wa em da u chyiap rong lieh wa ka um rong suiñ bneiñ wa jngiar bha wei kawa ka-it bha ki bru wow lai yimpa.
Ka Kadmat Beach won toh kawa ka-it bha ki bru kiwa wan da ki jhaad wa kiwa yalehke ya ki Water Sports. Em ko leh chiboon kiwa pynka-it ya kiwa maya rymaw wei ym toh ware ka thaw wa chit. U chyiap wa lieh wa ka um wa jngiar.
Ha waroh kini ki Beach da booh da ki bru wow pynkhooid ya ki kamjooh kiwa pait ya kiwa lai yimpa. Kini ki Beach hap ki wow pynhun ya 33 tylli ki kyndon wa da booh da ka Foundation for Environment Education (FEE).
Kiwi de ki Beach hapoh India kiwa da dep yoh yei naam Blue Flag toh ka Shivrajpur ha Gujarat, Ghoghla ha Diu, Kasarkod wa Padubidri ha Karnataka, Kappad ha Kerala, Rushikonda ha Andhra Pradesh, Golden ha Odisha, Radhanagar ha Andaman & Nicobar, Kovalam ha Tamil Nadu wa Eden ha Puducherry.
Ka Foundation for Environment Education toh wa em ha Denmark (FEE) kawa e yei tipmit kiwa tip leh kam ki Eco-Label namo ka Blue Flag Certification.
