Ka NEHU, Tura Campus waka Community College yong ka NEHU Wahiajer wa tip kam ka Deen Dayal Upadhaya Community College for Skill Development, Wahiajer chirup i yakrehlang ka ICAR-IIHR, Bengaluru ha ka 25 tarik uni u bnai da pynman ki yei e sikai wa kyrpang neibynta ki warep ka Ri-loom Jaiñtia wa tip kam ka “Capacity Building Programme ICAR-IIHR Technologies for Production of Horticultural Crops in NEH Region”.
Haka yalang e sikai ya ki warep wa da pynman ha NEHU-DDUCC for Skill Development da yoh i klam pdiang na ka Prof. S.M. Sungoh, Principal DDUCC, u Prof. S.K.Singh, DDC Horticultural Sciences, ICAR da man u kam u kongsan, u Dr. Prakash Patil Director ICAR-IIHR kam u symbood kongsan, hei emlang u Prof. D. Walia, Dean, SHEES, NEHU Shillong, u M.B. Tongper, ADC, West Jaiñtia Hills District, u Wolnish Rymbai, College Programme Coordinator, DDUCC, u waheh chnong Wahiajer, u Sanwotki Laloo, ki khynroo khyllood puræ ka NEHU-DDUCC, u Prof. P. S. Shukla, Vice-Chancellor, NEHU, u Prof. C P. Suresh, Organising Secretary, NEHU, Tura ki paaid warep wa kiwi.
Da wan wow e i batai bniah heiyatoh wa i buit rep katkam wa yah ka juk khnang yow man i rep wa pynmyntoi pynyoh nong da u Dr. T. Sakthivel, Principal Scientist, IIHR and Nodal Officer, NEH Plan, ICAR-IIHR, uwa da khana leh ya ki jait dawai wow e yada ya ki mar rep yow miat u bha ki wow lait nei baam khñiang.
Neiliang u kongsan, u Prof. S.K.Singh, DDC Horticultural Sciences, ICAR hawa klam ong u wa daw thooh boon ki laad ki luti neibynta u pynku yei rep i riang ha ki bynta palat sor ka thaaiñ mihsngi khnang yow yoh bor yoh mynsien ki warep ka thaaiñ.
Yaroh u leh yei kreh chitom ki warep wow pynbiang mar baam, najrong wa pynsñiaw u yei emkaam i rukom rep dei sboh ramaw wa wot neiliang ka sorkar leh da pynchlur bha ko ya ki warep wow leh yeini.
Hawa kyntu ya ki paaid warep wow man kiwa yakrehlang, ong u kamwa ka sorkar em ko ka thong u pynku yei kaam rep ha kani ka thaaiñ, yooluti u leh wa ka Meghalaya mynried u man kawa hakhmat wa ye u pynmih ya ki jhoor.
Kiwi won wa klam leh da booh ki i kyntu kyrsu ya ki warep wow man kiwa chimkhia hei kaam rep dei wow paitbniah yei man i long ki jait mar rep wa da thung wei u sumaar leh nadooh dang khian hadooh wa heh kamwa sumaar ya ki khon khian, heijooh i por leh u bood yei rukom rep kamwa kylla i por khnang wa iwon iwon iwa rep u man iwa pynmyntoi pynyoh nong.
Ha kani ka sngi da em leh ka bynta yachem yumut ki paaid warep waki Scientist heiyatoh iwa chem ki lyngba ki jait mar wa ki da ya rep ki.
Najrong i sikai, ha kani ka sngi ki warep da yoh ki leh yei dawai yow e yada ya ki mar rep, kamjooh da yoh ki deilang ki symbe jhoor.
Discussion about this post