Ka Muster Roll & Wage Earners Employees, Thrift and Consumer Co-operative Society Ltd, Jowai chirup wa ka chnat ka All Jaiñtia Muster Roll Workers Labour Union, chnat Moodymmai lyngba ka yung krehkaam ka Krishi Vigyan Kendra (KVK) yong ka West Jaiñtia Hills District hapoh i yahkhmat u Dr. R. Suchiang, AH&V, da pynman ya i e sikai ri syiar ha ka 27 tarik uni u bnai ha yung dorbar ka dong ha Lumsalah Moodymmai.
Ya ka yalang da pynlai da u Lowis Siangshai, President ka AJMW&LU chnat Modymmai. Heiwa da yoh ya i klam na u K.L. Pariat President ka AJMW&LU seiñbei, uwa da khana wa hadien wa ka sorkar jylla hapoh i yahkhmat u Conrad K Sangma kam u montri rangbah uwa pait leh ya ka yarong poisa ka chnat yong ka jylla Meghalaya, da hukum wa nadooh u Naiyñiaw, 2020 ya waroh ki chnat ka sorkar wow su noh ki man-u-bnai ya ka nong sngi ki wakreh Muster Roll wa u pynpoi ki ya ka poisa ha ki Bank Account ki wakreh man ka tayaw wa nyngkong u bnai uwa mih, kamjooh neiliang ka seiñ hadien wa da sylli bha ko ya i man i long khamtam i yoh kreh yoh khih ha ka jylla hadien u COVID-19. Da rai ko wow paan yarap na ki chnat ka sorkar yow e sikai ya ki khon ki kti yong ki wakreh Muster Roll, ki wakreh chet ja sngi ha ki School, ki warep wa kiwa mylla sngi.
Neiliang u D. Pasweth uwa pait ya ka KVK, kiwa da wan chakhmat wa oo yow e sikai kammon u ri syiar, chna sboh wa kiwi kiwi ki kaam kiwa yatoh wa ka rep ka riang kawa u pynman khih kamjooh kawa ye u pyndap pynbiang baam ya ka District wa ka jylla, heijooh i por ka KVK u e yarap u kyrchaan ko ya kiwa da dep u chah sikai yow ye ki u yieñ ha ki kjat ki yong ki yow man khih ki.
U K.L. Pariat da pynyoo nongmuna u ya i khih i kreh yong ki manchwa longchwa ki yong i, kiwa da lai dei kjat dei yong tayaw u lai khih chadooh cha Chilot kawa katni ka Sylhet ha Bangladesh kamjooh chadooh cha Bhoi næ Assam, iwa hadooh katni wa dang im dang sah naam i ha kini ki loom ki pdeiñ ki yong i. Kamtæ lada ki manchwa ki longchwa ki yong i da ye ki u khih u kreh yoh poisa yoh ksiar ki, neh sah ka jait ka kynja ka yong i hadooh katni, ki khynroo ki khyllood ki pateiñ kiwa daw heh u ye hi ki khamtam ha kani ka por wa da biang ka lai ka wan, da jan ka yaklam ya khana wa kiwi tawan ki jaitbru ha pyrthai. Kyntu joor u ya waroh ki khynroo ki khyllood, ki warep wa mylla, wa u mih noh ki chakhmat ym toh de u ya chongsngi namo u khñium wa ym yoh kreh ki, tangwa chirup yow yaleh i ha ka yurim iwa da i hi u kreh, neibynta u myntoi i yong i hi, kattæ yow biang ka baam ka dih wa ka poisa ha ka jylla ka yong i hi, u im ka jait ka kynja, u neh ka khyndaw ha kini ki loom ki pdeiñ kiwa i daw e kti won i ha ka pateiñ kawa daw heh.
Ha kani ka yalang hachwa u sdang ka e sikai, da yoh ya i klam kyntu na u N. Laloo u waheh chnong ka dorbar chnong Moodymmai, uwa da kyntu joor ya ki khon khynroo khyllood ka chnong wow man noh ki kiwa laitlooid ha ka khih ka kreh khamtam yow sdang noh u pynkreh kaam na iwa yoh ki na kani ka e sikai (Training) khnang wa ka chnong ka thaw ka District ka yong i hi u ye ko u chalan ya ki syiar cha kiwi tawan ki jylla.
Ha kani ka e sikai u Tymmen Wasan u A. Tamang uwa man u General Secretary ka Dong Lumsalah Moodymmai wa ka D. Talang, Secretary ka seiñ chnat Moodymmai da saam ki ya ki symbe piat, kajor, pallong, yanem phniang cha ki arphaw ngut ki warep ka chnong Moodymmai. Ya kani kajooh ka e sikai kammon u ri syiar wa i saam symbe jhoor da dep pynman ha chnong Mihmyntdu ha ka 24 tarik uni u bnai lyngba ka SHG ka seiñ AJMW&LU ha i yakhmat ka Susan Dkhar wa u R. Chyrmang, President wa General Secretary. Ya kani ka jooh ka e sikai u man biang ko nadooh u Khonchonglad (Nov) ha waroh ki chnat ka seiñ ha ki C&RD Block ka ri-loom Jaiñtia.
