Ki kattu katni ki bynta ka thaaiñ Northeast ka ri India u pdiang ki ya u Naichiphaw da u slap nadooh ka 1 tarik hadooh ka 3 tarik katkam wa pyntip ka India Meteorological Department (IMD), heiwa u slap daw hiar u ha ki kattu katni ki thaw kam ha Assam, Meghalaya, Nagaland, Mizoram, Manipur wa Tripura.
Uni u slap u em u neidaw wa em i skit ka Cyclone ynnin i step ha Bay of Bengal hajan Andhra Pradesh.
Heiyatoh wa ini, ka IMD da pynmih ko yaka Yellow Alert kawa mut wa toh u tip wa ye u slap u joor ha kini ki jylla nadooh ka Thursday hadooh Saturday.
Ka jylla won kawa da chah ktah dooh nei joor u slap toh ka Assam heiwa da em 2.79 lak kiwa da chah ktah nei chlai um ha ki 12 tylli ki District na ki 33 tylli heiwa ha uni u snem da em 120 ngut wa yap na i chlai um. Pala 27,505 Hectare ki thaw rep wa 460 tylli ki chnong kiwa da chah ktah nei chlai em haka sien wa le ha uni u snem.
Heiyatoh won wa i rukom hiar slap ha ka thaaiñ Northeast, nadooh u Naiynru (June) 1 hadooh u Naikhynde (September) 29, ka Arunachal Pradesh da yoh (1935.6 mm) u slap, ka Assam (1651.2 mm) wa ka Tripura (1301.4 mm) iwa man katkam wa jooh hiar hi u slap, katwa ha Nagaland (803 mm), Manipur (744.7 mm) wa Mizoram (1088.5 mm) iwa duna neiwa jooh hawa nujor wa kiwi ki por. Katwa ka Meghalaya toh du ka donhi na ki jylla ka Northeast kawa yoh slap palat yeiwa jooh iwa da poi 3982 mm.
