Ki ar tylli ki spah Run na u Arpit Bhatewara wa u Kishan Lyngdoh da yarap ya ka Meghalaya wow pynskem ya ka 1st Innings ko deiwa kamai 271/2 hadooh wa kut ynne kawa man leh ka sngi wa ar ka yalehke ka Ranji Trophy 2025-26 (Plate Group Match) pyrchah ya ka Sikkim ha ka madan ka MCA ha Shillong.
Hawa kut ynne, u Arpit da yoh u 132 (Not Out) katwa u Kishan da yoh u 102 (Not Out). Ka Meghalaya kattu da emkaam ko 75 Run yow pyntam yeiwa kamai ka Sikkim ha ka 1st Inning yong ka kawa da yoh 346 (All Out).
U Arpit wa u Kishan da kamailang ki 212 deiwa sdang heipor wa yoh ka Meghalaya 59/2 deiwa haap chwa u Arien Bonchang Sangma (16) wa u Ajay Duhan (4) kiwa da haap ha u Kranthi Kumar (1/62) wa u Palzor Tamang (1/44) ka Sikkim.
Kini ki ar ngut da kamai ki kamwa 4 Run chi Over tangwa da suki won chwa wow kut ka yalehke yow lait u haap.
Kani ka spah Run u Kishan kattæ toh kawa le yong oo ha ka Ranji Trophy.
Discussion about this post