Ar ngut ki khynnah kynthai kiwa yalehke Wushu na West Jaiñtia Hills District da yoh ki wow khur takma ha ka Asmita Khelo India Wushu Women’s League 2025 kawa da pynman ha ka 9 tarik uni u bnai ha SAI Centre NEHU Mawlai, Shillong kawa da pynman da ka Meghalaya Wushu Association.
Kiwa jop toh ka Wanbhaki Suchiang kawa lai puræ ha Seinraij Higher Secondary School Jowai ha Class-XII (Arts) kawa da yoh takma rupa ha ka Senior Women-45kg.
Sa kawi won toh ka Valiancy Lamare kawa lai puræ ha Don Bosco School, Mihmyntdu ha Class-VIII kawa da yoh takma rupa ha ka kyrdan Sub Junior-40kg.
Ha kani ka lympung da yahkhmat da u Ferdinand Suchiang wa u Riwodmiki Lyngdoh deilang wa u Coach, u Niawki Ïakai uwa man u dkhot yong ka West Jaiñtia Hills District Wushu Association uwa man leh kam u Official (Head judge) ha kani ka lympung.
Neiliang yong ka West Jaiñtia Hills District Wushu Association da pyn-eh-daw ko ya kini ki kynthai yow nang ku hi ha ka yalehke Wushu wei da e khublei leh ya ki Principal yong kini ki ar tylli ki skur wa ki bei ki pa yong kini ki khynnah kynthai.
Discussion about this post