Jowai : Ka yungsah ki khonswet chynrang ka North East India Mission Association (NEIMA), Orphanage Home wa em ha Sahsniang da wan wai ya ka da u V.H. Pala MP ynnin ka 21 tarik.
Ya kani ka yung da chna thymme sa chi mala ha jrong ka yung wa da em chwa heiwa u Chanbor Wahlang uwa na Sutnga da e sñiawbha u T. 3,50,000 wow chna ya ka mala wa thymme wei da yarap poisa leh na ki paidbah.
Ya kani ka yung da chna ha i thaw yong ka Balang Presbyterian Sahsniang iwa tip kam ka Lumthymme Sahsniang A, kawa man leh ka yung skur wa puræ ki khynnah khonswet ka NEIMA.
Ha ki 12 snem nachwa waroh ki khynnah khonswet ka NEIMA da sah lang ki ha i jooh i yung chynrang wa kynthai kamtæ da emkaam wow pynsah ki jar jiar ki thaw.
Ha chwa wow wai ya u moo sahkynmoo yong kani ka yung da em ka yalang wa pyllai da u Rev. L. Rodborne, heiwa da e leh ya ka dorkaht cha u MP kawa da paan yarap wow kær ya u pood u ang kani ka thaw, wow pynbaing ka um dih, u pynyoh computer wa i sikai soor, sikai thaaiñ wa kiwi kiwi ya ki khynnah.
U Vincent Pala da kular u wow pynyoh ya waroh kini wei daw e u hadooh 10 tylli ki computer wei da kyntu u leh ya ki MLA wa MDC yong kani ka thaaiñ wow yarap ki yeiwa emkaam kini ki khynnah.
Ha kani ka sngi da yoh leh yei klam na u Robinus Syngkon MLA, Comingone Ymbon MLA, Tbn T.S. Nongkseh Balang Umpathaw, da emlang wa ki dkhot ka Khliehriat NEIMA Unit, Sutnga NEIMA Unit.
U Nehimayah Tyngkang da e u T. 20,000 wa u K. Wahlang uwa da e T. 30,000 neibynta kani ka yung thymme.
Da pynphooh pynphieñ chooh chooh ya kani ka sngi da ki khynnah khunswet ka NEIMA kiwa e ya ki rwai wa pynlung mynsien ya waroh kiwa emlang.
Discussion about this post