Ka Meghalaya State Legal Services Authority (MLSA) deiwa ya krehlang waka Directorate of Social Welfare, ka Health & Family Welfare Department, ka C&RD Department, ka District Legal Services Authority, East Khasi Hills wa kiwi de da pynman ki ya ka Health Camp wa i pynsñiawthooh paidbah ya ki Scheme ka NALSA wa ki Scheme sorkar wow pyndooh yei dooh i duk hajrong ka phang ‘Bridging the Gap’ wa da pynman ha St. Peter’s Secondary School, Dangar, East Khasi Hills District.
U Justice H S Thangkhiew, u Judge ka High Court Meghalaya uwa man leh kam u Executive Chairman, MSLSA da wan u wow embynta kam u kongsan.
Hawa e yei klam, neiliang u Justice H S Thangkhiew da pynche u chaphang ki NALSA Scheme deiwa pynsñiaw leh yei hun i pynkrehkaam ya kini da kiwa boon ki chnat iwa daw yarap bha ya ki paidbah. Kamtæ da kyntu u ya ki paidbah wow wan chakhmat kitu wa kwah wow e yarap ya ki paidbah heiyatoh wa ka aiñ deiwa man kam ki Para-legal Volunteers; kiwa man leh kam kiwa nyngkong dooh wa yachem wa ki paidbah chwa wow poi ki cha ka yung bichaar. Da pynchlur u leh ya kiwa emlang ha kani ka sngi wow lai ki cha ki dukan wa da booh da kiwa boon ki chnat sorkar yow yoh yutip ki chaphang ki laad yarap wa e ki.
Ha kani ka sngi, u kongsan da saam u leh ya ki tiar yarap wa kynthup ya ki Wheelchair, ki Hearing Aid wa ki dieñ chdooh cha ki bru wa duna hei doh i pran.
