Kam chibynta wow yarap yei khooid i jngiar wei wow pynlang jhep, da pynlait ya ki Truck kit jhep neibynta ka Khliehriat West wa yaka Ladrymbai Datsympein kiwa da thied hapoh ka District Mineral Foundation (DMF) Fund yong u snem 2024-2025.
Ya ka Truck neibynta ka Khliehriat West da e kti da u Montri sorkar uwa man leh kam u MLA ka thaaiñ u Kyrmen Shylla kam u kongsan deiwa emlang leh ka MDC ka Rymbai-Khliehriat, ka Violet Lyngdoh, deilang ki waheh chnong wa ki khlieh District nadooh u DC, u Shivansh Awasthi wa kiwi de ha ka yalang wa da pynman ha Community Hall ka Khliehriat West.
U Kyrmen Shylla hawa e yei klam da khut u yei ya krehlang yong kiwa chong chnong yow pynemkaam ya kani ka kari yow yarap wanrah yei khooid i jngiar ha chnong Khliehriat.
Da khana u leh yei kreh ya u sarok wow pynyabi ya ka thaaiñ San Chnong ka East Jaiñtia Hills cha Shkentalang ha West Jaiñtia Hills hei lut wa Rs. 125 klur yow pynsuk yei khayi pateiñ kamjooh wow pynku ya ki kaam uiñke suwari.
Ya ka Truck neibynta ka Ladrymbai Datsympein leh da e kti da u Montri hi ha ka yalang wa da pynman ha ka Community Hall ka chnong deiwa emlang ki jooh ki heh sorkar deilang kiwa chong chnong.
Discussion about this post