U Dr. Rangksan Singh Thangkhiew uwa man uwi na kiwa sdang wow pynlai (Director) wei uwa man leh kam u Chief Gastroenterologist yong ka Supercare Hospital, Shillong da yoh u ya i naam ‘Distinguished Career Award’ ha ka yalang yong ka ‘Northeast Healthcare Summit 2023’ kawa da pynman ha Radisson Blue Hotel, Guwahati, Assam ha ka 28 tarik uni u bnai.
Ha kani ka yalang da tipmit wei da sñiawngooh ko yei kreh chitom wei kyrchaan ko ya ki kattu katni ki bru wa kreh ha i e sumaar ha ka thaaiñ mihsngi ka ri.
U kongsan ha kani ka yalang toh u Keshav Mahanta uwa man u Montri ka chnat i chait i khiah ka Assam katwa u Dr. Sapam Ranjan Singh u monntri ka chnat i chait i khiah wa ka IPR ka sorkar Manipur da man u kam u symbood kongsan.
Kam kani ka yalang da pynman nyngkong dooh ha u snem 2019, wei la soo sien kattu ka yalang e laad ko wow tipmit ya ki seiñ wa kreh ha i chait i khiah na Assam donhi. Katni ka sieñ won man ko kawa nyngkong wow pynyaar ya ka heiwa da kynthuyp ya waroh ki jylla ka thaaiñ mihsngi kynthup ya ka jylla Sikkim.
Kani ka yalang pyrchang ko wow tipmit wei wow sñiawngooh ya kiwa da kreh chitom pura wei mynsien raikut ha i chait i khiah ki bru ka thaaiñ ka thaaiñ.
U Dr. Thangkhiew da yoh u ya kani ka khusnaam neibynta i kreh chitom wei i yahluti yong oo ha i chait i khiah ha ka jylla Meghalaya.
Kam wow kdaw heini u Dr. R.S. Thangkhiew da pyndep u ya i puræ MBBS na ka Assam Medical College ha u snem 1980, wei da pyndep u sa ya ka MD (Medicine) na ka PGIMER. ha Chandigarh ha u snem 1985. Da man u leh wa nyngkong dooh ha ka thaaiñ mihsngi wow man kam u Superspecialist ha ka Gastroenterology, heiwa da pyndep u ya ka DM (Gastro) ha u snem 1987 na PGIMER, na Chandigarh.
Da man u leh u Doctor wa nyngkong dooh wow wanrah ya ka ERCP namo ka Endoscopic Retrograde Cholangiopancreatography kawa man ka rukom sumaar kawa kynthup lang ya ka Endoscopy wa ka X-ray khnang wow chem yei chitom wei kammon u sumaar ya ki bru ya kawa da tip kam ka Pancreatic Ductal System.
