Ka Rotary Club of Orchid City Shillong, ynnin ka sngi chirup wa ka Martin Luther Christian University, Shillong wa ka ESRAG South Asia da pynman ko ya ka Webinar hajrong ka phang “Rotary Speaks Green”.
Ha kani ka sngi da pynkup ya i naam “Environmental Champion Award” cha ki le ngut kiwa embynta hei wow yada ya ka rymaw ha kiwa boon ki liang.
Kini ki le ngut kynthup ki ya u Morningstar Khongthaw, u Jiwat Vaswani wa u H. Hamkhein Mohrmen.
U Morningstar Khongthaw toh uwa da paw bha hei wow pynneh ya ki yingkieñ jri namo ki Root-bridge ha Meghalaya wei da tipmit ya oo da ki seiñ wa boon kamjooh leh da ka sorkar.
U H. Hamkhein Mohrmen toh uwa kreh wow yada ya ka rymaw khamtam ki um ki wah ha Ri-loom Jaiñtia wow lait ki nei chah ktah ha i tih ya ki mar poh-khyndaw.
U Jiwat Vaswani toh uwa jooh yahkhmat hei wow pynkhooid ya ka sor Shillong wei man u leh kam u Managing Director ka Jiva Hospitality (India) Pvt. Ltd., Shillong.
Neiliang kini ki le ngut da e kbublei ki ya ka Rotary Club of Orchid City Shillong, MLCU wa ka ESRAG South Asia wa da tipmit ko ya ki kaam yong ki deiwa kyntu ya kiwi wow kreh neibynta wow yada ya ka rymaw.
Ha kani ka Webinar da yoh i klam na ka Kynsai Ria Kharkhongor, Rtn Reema V Diengdoh, dkhot ka RC Orchid City Shillong, wa na u Rtn Jaideep Malaviya, Director, ESRAG South Asia.
