Ka khusnaam sahkynmoo wa tip kam ka Crystal Gayle Memorial Award da pynman ya ka ha Raj Bhavan, Shillong heiwa u Lat, u Phagu Chauhan da man u kam u kongsan deiwa emlang u Paul Lyngdoh, Montri ka chnat Arts & Culture.
U Lat hawa e yei klam da ong wa toh u em ka chlem kawa chngaaiñ neibynta kiwa rikor wa kiwa kyrsoi ya ki sap tynre wei ka sorkar toh u kyrchaan ko yei pyrchang yong ka synjuk Riti Academy kawa da chimkhia wow pynneh pynsah wei pynpliah ya kiwa boon ki kaam.
Da ong u wa ki bor sorkar da theh ki yei yarap lada em i ya krehlang da waroh ki bru nadooh ki kynrem lyndan hadooh ki bru paidbah.
Ya kani ka Crystal Gayle Memorial Award 2023 da e naam cha u Ian Lyngdoh Nongkynrih neibynta ka kot wa da thoh u hajrong ki yingkieñ jri wa em ha Ri-War heiwa da chem u da ki spah tylli, wa hajrong ki phlim TV wa da chna u wa da e pyrtuid ‘A Day in the Village’ kawa da pynyoo barabor da ka Doordarshan Kendra. Kamtæ da kheiñkhor hadooh kattæ kattæ ya kam uni u bru wa khroo uwa da emhok sakhiat wow yoh ya kani ka naam ka burom.
Kam chibynta kani ka sngi saam khusnaam, da pynbna paidbah da u Raphael Warjri, u Khliehdooh ka Synjuk Riti Academy wow kyntu naam da ka khusnaam sahkynmoo ya ki bru chemphang kiwa dang dep khlaad deiwa sdang da ka S Quotient Sumer Award waka Sumar Sing Sawian Award kiwa man ki bru wa da e chiboon cha ka imlang sahlang ha kiwa boon ki rukom.
U S Quotient Sumer toh uwa man leh kam u dkhot ka Sahitya Akademi wei uwa da thooh bniah chaphang u Kiang Nangbah wei kamjooh uwa chemphang ya ka dustur riti katwa u Sumar Sing Sawian toh uwa yahkhmat yei lai ku pyndep ya ka niam ha u Lum Sohpetbneng, uwa thoh kot wa u bru wa kreh neibynta ka riti dustur.
Kam chibynta wow pynyoo yei sñiawngooh, ka Riti Academy da pynkup burom ko ya kiwa ha-yung ha-sem kini heiwa ka Riwotki Laloo wa u khon ko u Riquoma Rq Laloo da wan pdiang ki neibynta ka S Quotient Sumer Award wei ka Bijoya Sawian da pdiang ko ya ka Sumar Sing Sawian Award.
Discussion about this post