I pyrchah yei thmu tih ya u Uranium ha Meghalaya da bna wei da tip leh ha ka ri India lyngba ka Short Film wa e pyrtuid ‘How a village in Meghalaya fought against Uranium Mining’ ya kawa da pynmih da ka khubor ‘Quint’ deiwa ya krehlang wa u t7 News na Shillong.
Kam ka dak wow tipmit ya kiwa stat u thoh wa ya ki khubor, ka Mumbai Press Club da e ko leh ya ka khusnaam wa da tip kam ka Redink Award, wei kani ka Short Film da jop ko ha ka kyrdan Environment Category (TV). Ha kani ka kyrdan da em hadooh 5 tylli ki phlim kiwa da chah jied, wei yei jop da yoh da kani ka phlim kawa da pynyoo chaphang kiwa chong chnong ka Meghalaya wei khamtam dooh hajrong i yieñ chlur ka men Spelity Lyngdoh Langrin wow pyrchah bait yei tih ya u Uranium na Domiasiat, South West Khasi Hills.
Ya kani ka khusnaam kawa heh neibynta kiwa thoh khubor da lai wow pdiang da u Dominic Savio Diengdoh uwa man u Producer yong ka Channel t7 News wa u Tridip K Mandal uwa man u Producer yong ka khubor ‘Quint’ ha ka yalang wa da pynman ha Mumbai ha ka 16 tarik uni u bnai ha NCPA, Marine Drive.
Ya kani ka phlim da pynmih da ka Quint wei da pyntoh pyntne da u Savio wa ki bru yong ka Channel t7 News.
Kiwa da yoh wow khur boon tylli ki khusnaam ha kani ka rynsan toh kiwa na ka BBC News.
