Ka President ka ri India, ka Droupadi Murmu ynne da pynkup burom ko da ka National Awards neibynta kiwa sikai na kylleiñ ka ri ha ka yalang wa da pynman ha Vigyan Bhavan, New Delhi kam chibynta ka Teachers’ Day.
Na Meghalaya da em arngut kiwa yoh ya kani ka khusnaam kitæ u Timothy Jhones Dhar wa u Madhav Singh kiwa da yoh ya kani ka National Teachers’ Award 2023 na ka President.
U Timothy J Dhar toh uwa sikai Mechanic ha ki kaam chna kari ha Industrial Training Institute (ITI) ka sorkar wa em ha Shillong.
Da man u kam uwa sikai la 25 snem wei da ye u wow e sikai wot ya ki rukom chna ya ki kari kiwa thymme hanla duna ki tiar ki tar deiwa pynemkaam yei stat yong wow thooh laad kammon wow pynemkaam da ki tiar warim yow pynyoo kammon wow chna ya ki kari wa mih thymme.
Da ini i rukom sikai da e laad u leh ya kiwa boon wow yoh kreh ha kiwa boon ki karkhana wa em hapoh Meghalaya kamjooh cha baar ka jylla. Kiwa chah sikai ha oo da lehbha ki leh ya ki All India Trade Test Exams.
Da dep u leh wow yoh ya ka Kaushalacharya Awards 2019-20. Wei dei rukom man u uwa chngaaiñ hei rukom manbru da ye u wow jop ya iwon iwon i eh wei man u leh uwa e mynsien cha kiwa chah sikai ha oo.
U Madhav Singh won toh uwa sikai Science ha Alpha English Higher Secondary School, Ri-Bhoi District wei da jooh man u kam u bru chemphang wa da chah jied wow mihkhmat ha ka National Children’s Science Congress wei da emkti u wow pynchlur wei wow pyn ka-it ya ka Science hapyrdi ki khynnah khian.
Kam u Coordinator ka Green Club, da jooh pynman u boon jait ki kaam neibynta ki khynnah wow leh ki wei da thoh u leh ya kawi ka kot heiyatoh waka Health Education. Da dep yoh u leh ya ka State Best Teacher Award ha u 2021.
Da khana u wa da sdang u wow sikai ha u snem 2000 mar ya dep u yei puræ B.Sc na Shankar Dev College Shillong wei heitu i por dang yang u ya ka Result wei da lai kreh u chipor heithaw uwa jooh sikai hi ya oo uwa dang lai pyndep B.Ed Training kam uwa sikai ka R.B.P. Secondary School Nongpoh, wei da kreh u ha itai i por deiwa kreh Officiate chi snem.
Hadien ini, uwi na uwi uwa jooh lai puræ lang wa oo, u Malvin Passah uwa da man Pastor katni da khut u ya oo wow wan sikai ha Alpha English Higher Secondary School Nongpoh ha u snem 2001 wei khlem da pyrkhat da pteiñ u wow sikai wei da neh bait u ha kani ka skur hadooh kini ki sngi.
Hawa klam heiyatoh waka Science, da ong u wa da ka-it u ka kani ka Subject nadooh wa dang khian u wei da chimbynta u ha kiwa boon ki Science Exhibition wa da pynman da u DC ka Ri-Bhoi nadooh u snem 1992-93 kam u khynnah ka R.B.P. School Nongpoh.
Kani ka National Teachers’ Award toh yow lehkmen wei wow leh burom ya ki kaam wa bha wa da e da kiwa sikai hapoh ka ri kiwa da yarap ya ki khynnah wow poi ki chakhmat. Kini kiwa yoh ya kani ka Award da yoh ki leh ya ka Certificate of Merit, ka song poisa kawa T. 50,000 deilang wa i Silver Medal.
Discussion about this post