Ka TUR da beiñ ko ya ka hukum yong ka chnat pynlai kari ka East Khasi Hills wow pynchitom wei wow khanglaad ya ki bru khamtam ya kitu kiwa im ja-kpoh deiwa kamai da ki Scooty ne ki thuk-thuk wow lai booh bru ha kylleiñ ka nongbah Shillong.
Kani ka hukum ka chnat Regional Transport Authority ka East Khasi Hills wa da pynmih ha ka 8 tarik uni u bnai da ong ko wa katkam ka kyndon Sub Section (1) ka Section 66 ka aiñ Motor Vehicle Act. 1988, ki ar chaka wa krehkaam kam ki Taxi deiwa leh da ka Online wa Offline kamwa leh ka Rapido, Uber wa kiwi de da khang ya ki wow kit bru ki wei daw pynchitom ya kiwa leh pyrchah ya ini.
Ka TUR da ong ko wa lada khang laad ya kani ka kamai ja-kpoh lyngba ki thuk thuk, da wan i heipor wa chitom wei dooh kreh bha ki bru wei ini i kamai da ki ar chaka da yarap bha ko ya ki khynroo khyllood wow yoh kreh wei da myntoi bha ki bru wa lai wa wan.
Neiliang ka DC ka East Khasi kawa man leh kam ka Chairman ka Regional Transport Authority (RTA) da ong ko wa katkam ka aiñ Meghalaya Taxi Aggregator Operational Rules kawa da pynbna da ka chnat Transport haka 14-02-2020, waroh kiwa kamai kari kiwa tip kam ki Taxi Aggregators wa ki Bike-Taxis hapoh iwi i pytuid ka Company hap ki wow yaleh chwa ya ka License chwa wow sdang ki u krehkaam.
Tangwa da yoh ujor wa da em ki bru wa pynkrehkaam kam ki Bike-Taxi khlem da yoh License kamjooh ki kot ki sla wa emkaam kamtæ ka Regional Transport Authority wa khlieh da ka Deputy Commissioner ha ka yalang wa da pynman khaddooh ko da phah ya u DTO wa Member Secretary yow phah ya waroh kini kiwa pynkrehkaam ya ki Bike-Taxi wa hap ki wow bood ya ki kyndon yow pyntipmit ya kiwa yah ya ki kari, kamjooh yow pynyoo wa ka kari toh kawa biang, i dor wa chim toh katkam wa da mynjur da ka sorkar, wa biang ki yei thaw pynyieñ kari, ka Helpline yow yarap ya kiwa pynemkaam wa kiwi kiwi de.
Da ong leh wa ka Rule 6 (b) 11 leh da klam che ko wa kiwa yah ym toh wow kit bru ki deiwa chah pynsangeh cha luti syngkieñ wei yeini da yoh ujor da ka RTA neibhah kini toh kiwa pynemkaam da ki App yoh yoh bru (Passenger) kamtæ da phah wow leh yeiwa emkaam ya ini deiwa booh por.
Kamtæ da pynche wa ka hukum wa da pynmih ha ka 8 tarik da wanrah ko yei wym sñiawthooh kiwa boon neibhah ym em da khana bniah ko ya ini waroh wei da phah wow pynbait noh yeini.
Kamtæ lada em wa chah ktah na ki kyndon aiñ ye ki wow wan chakhmat wow yachem waka Deputy Commissioner & Chairman, Regional Transport Authority lane wa u District Transport Officer, East Khasi Hills.
