Ka Viksit Bharat Youth Parliament (State-Level) neibynta ka Meghalaya da pynman ka da ka Nehru Yuva Kendra Sangathan (NYKS) deiwa ya krehlang wa ka National Service Scheme (NSS) ha Lariti International Centre for Performing Arts & Culture, Mawkasiang ynnin ka sngi heiwa da em waroh 75 ngut kiwa chimbynta na ki 12 tylli ki District ka Meghalaya, kiwa da yatai hajrong ki phang wa yatoh wa ka riti synchaar ka ri India.
Ya kiwa chimbynta da bichaar da u Speaker ka Meghalaya Legislative Assembly, u Thomas A. Sangma ki MLA wa kynthup ya u Brightstar Marbaniang wa u Celestine Lyngdoh.
Kiwa chimbynta da yaklam ki hajrong ar tylli ki phang kitæ ka “75 Years of the Indian Constitution: A Journey of Rights, Duties, and Progress” wa “The 11 Sankalp of Samvidhan Divas: A Pledge to Strengthen India’s Constitutional Values.”
Hawa kut da jied ya le ngut kiwa jop ki wow mihkhmat ya ka Meghalaya ha ka National Youth Parliament wa daw pynman ha New Delhi.
Yei naam jop da yoh u Saurav Kumar uwa mihkhmat ya ka East Khasi Hill uwa puræ ha NEHU wei da yoh u leh ya ka song poisa kawa ₹10,000, hei wa ar da yoh ka Angel Kalung kawa mihkhmat ya ka East Jaiñtia Hills kawa lai puræ ha Don Bosco College Byndihati wei da yoh ko leh ya ka song poisa kawa ₹5,000 katwa hei wa le da yoh u Dabitkupar Syiemlieh uwa mihkhmat ya ka South West Khasi Hills uwa lai puræ ha Sngap Syiem College, Mawkyrwat uwa da yoh leh ya ka poisa wa ₹3000.
Ka Angel Kalung toh kawa jop ya ka Vikit Bharat hawa pynman ha East Jaiñtia Hills.
Discussion about this post